تسلمين حبيبتي سوسو على المتابعة
و اذا قدرت اليوم بخلصها
و هذا لعيونكم
ــــــــــــــــــــــــــــــــــــــــــــــــــ ـــ
تكمله الجزء العاشر
بريطانيا
اليوم الثاني
عيسى : زين دام للحين مابدأ الكورس الصيفي .. ليش ماتبي تي معانا ؟
راشد : عيوس والله استحي .. فشله كل يوم راز الويه عندكم .. شيقولون عني لزقه
عيسى : هههه منو بيقول عنك ييعني ؟
راشد : امك مثلا ... اووو . . اختك شوق
عيسى : لا محد راح يقول شي .. يلله قوم بتم برووحك هني
راشد : اكيد مافيها احراج ؟
عيسى: اف كورس
طلعوا كلهم يميع يتغدون بره .. وعقب راحوا يدورون في مجمعات لندن القريبه منهم .. وعقب راحوا الريجنت بارك وبعض المنتزهات
وطول هالوقت .. راشد عينه على شوق اللي هدوئها كان مغريه ومحيره حد الجنون
وهو يقول بقلبه .. يعني هذا اليوم الثاني اطلع معاهم .. معقوله البنت للحين تستحي مني ..!!
وهما في الحديقة
عيسى : ايييه هذا الجو .. صج الين ماارد الكويت .. الشي اللي بفقده اهوا الجو
راشد : من صجك انت .. والله بيرجع لونا الطبيعي .. ليكون عبالك انتا ابيض مستانس بعمرك .. اذا وصلت الكويت ولفحك ذاك الحر والشمس فوقك .. عزالله بتصير فحمة
الجميع : هههههههههههههههههههههههه
بس عين راشد كانت على شوق .. اول مرة يشوفها تضحك براحه ولا عمره عيونها انحطت بعيونه
لكن هالمرة . .ضحكت وهي تشوفه
راشد بقبله : ياويل حالي .. والله انج احلى لما تضحكين ياشوق .. مستعد اليوم اقلب مهرج بس ماانحرم من هالضحكه
شوق اللي انحرجت وحست انها خذت راحتها .. نزلت عيونها ولهت باوراق الشجر اللي طايحه يمها
ام عيسى : انا بعرف انتي اكثر وحده حنيتي علي عشان سفرة لندن .. مااشوفج متحمسه مثل كلامج
شوق اللي انحرجت : هاا .. لا عادي يما .. تونا ياين ماصارلنا يومين
عيسى : لااليوم راح اوديكم متحف الشمع وعقب ساحه الحمام والبيج بين .. والعشا ..!!
راشد : عزيمة العشا علي انا
عيسى : انتا بتطبخ لنا شيف راشد
راشد بابتسامه : لا يا شيف رمزي .. الله يخلي المطاعم .. بس بعيشكم عشا لندني اصلي
ام راشد : يايما خلو الاكل علي انا .. خلكم من المطاعم
راشد : مايصير خالتي .. لازم اقوم بالواجب انا .. احم احم .. شرايك عيوووس .. اعجبك ها
عيسى : هههههههههه فاهم الدرس عدل
راشد وهو يطالع شوق بطرف عينه : شوف بس يمكن اختك مب *****ه تتعشى ولا شي
شوق اللي حطت عينها بعين راشد فجأة .. وارتبكت .. : انا لا عادي والله
عيسى : خلص عيل اذا جذي .. نبي مطعم سنع .. بيض الويه ههههه
راشد : ههههههه افاا عليك ان شالله يعجبهم
وهو عينه على شوق ..
عيسى : طيب رشوود .. ان بحجز تذاكر المتحف وانتا اخذهم لساحه الحمام وعقب انا اييكم لان مادري اذا فيه حجز ولا لا .. تدري اليوم اجازة ويمكن يكون زحمه
راشد بشويش : انتا خلك هني .. وانا اروح احجز التذاكر
عيسى : لا يبا .. انتا راح تدش معانا المتحف وان قلتلك روح احجز بتدفع عنا وعنك
راشد : وشنو يعني .. فلوسنا وحده يالدب
عيسى : رشود انا اعرفك .. قلتلك لا يعني لا .. استح على ويهك
راشد : زين بس لاتتأخر دق علي تلفون اذا لقيت حجز
عيسى : صار .. يما الحين رشود بيوديكم ساحه الحمام .. وانا ايكم هناك بشوف في حجز حق المتحف ولا لا
ام عيسى : زين يما ..
تحركت العايله كلها وراشد يمشي يدامهم عشان مايسبب أي احراج
ام عيسى : اقول يما راشد
راشد يلتفت : هلا خالتي امريني
ام عيسى : يعني يقولون في اختراع اسمه ماي عصير .. شي .. ياوليدي تعبنا
راشد يضحك من قلبه : ههههههههههههههههههههههههههههههههههههههههههه
وشوق اللي كانت تراقب ضحكته وهي مبتسمه
راشد : السموحه خالتي .. شنو تشربون ؟ .. شنو تبون ايبلكم
ام عيسى : انا ابي ماي ياوليدي .. بس لايكون بارد يكسر ضروسي ..
راشد : هههههههههه طيب
والتفت لبدر : ها بدر شبغيت ؟
بدر : ابي عصير فراوله
واخير حط عينه بعين الشوق .. وهو يبتسم : ها شوق شنو ايبلج ؟
شوق : مابي شي .. مشكور
راشد : ميصير . . الطريج طويل .. الين العشى بتعطشين .. ايبلج على ذوقي ؟
شوق : كيفك
راح راشد وشرى بطل ماي حق ام عيسى وعصير فراوله لبدر .. واحتار شنو ياخذ لشوق .. واخيرا اخذلها عصير برتقال نفسه .. وتمنى انها تحب البرتقال وماتفشله
راشد : تفضلي خالتي
ام عيسى : تسلم ياوليدي
راشد : بدر .. خذ حبيبي
شوق ... انا يبتلج على ذوقي ماادري تحبين عصير برتقال ولا لا ؟
شوق : ايي احبه
راشد : والله .. !! الحمدلله .. يبتلج نفسي وقلت يمكن ماتحبينه
ومد ايده وعطاها العصير
وعقب راحوا لساحه الحمام .. هناك بدر كان في اوج وناسته .. وحب المكان .. شوق كشت شوي وعقب استانست
ام عيسى اللي طول الوقت تعلق على الاجانب وتعيب على لبسهم وحياتهم
ام عيسى : ياويلي صج مايستحون شوف شلون مخلين ولدهم يدور من غير جوتي مكرم السامع
راشد : هههههههههه خاتي ترى هني كلشي عادي عندهم
ام عيسى : مالت عليهم .. ولا ديرة حريمهم مثل ريايلهم .. مافيهم احد متغطي وخزيااه
راشد اللي كان متونس على ام عيسى .. ويقول بقبله : والله انج فلم محصلش ياام عيسى ..
وهم قاعدين .. سمعوا بدر يصارخ ..
بدر : يما اااا
ام عيسى : نعم شفيك تصارخ ؟
بدر : شوق قرصتها الحمامه وهي تعطيها اكل
ام عيسى : بعد الحمامه شلون تقرص بلله عليك ؟ منو استاذ العلوم مالك خلني ازفه
راشد اللي اخترع : خالتي موقت تشوفين معلومات الولد .. خلنا نشوف شوق .. وينها ؟
بدر : كاهي ييت
شوق اللي عيونها مليانه دموع وويها الابيض متوهج ماسكه يديدنها وتبجي
ام عيسى : ياويل قلبي على بنيتي . شفيج يما ؟
شوق : نحله قرصتني .. انا كنت عند الورد هناك
راشد : لازم نوديها الطبيب .. امشوا
شوق : مابي طبيب
راشد : مو على كيفج .. يلله
شوق اللي انصدمت : زين
ام عيسى : شوف ايدها شلون حمرت .. ليكون هالنحله مسممه بس
شوق ببراءة : يعني راح اتسمم . . ؟
راشد : لا ان شالله .. يله ركبو السيارة .. العياده قريبه
ام عيسى : يما راشد كلم عيسى قوله احنا وينه عشان مايحاتي
راشد : ان شالله خالتي
راحوا العيادة والطبيب وصفلها مراهم ومضادات وراشد كان يكلم الدكتور اللي طمنه وقاله يومين ثلاثه وبتخف
ركبوا السيارة .. والهدوء عم المكان
وراشد بابتسامه : شلون ايدج ياشوق الحين ؟ ..
شوق وهي تطالع صبعها المقروص : خف شوي
بدر : يالعيااارة ههههههه
راشد ضحك على ام عيسى شلون تزف ولدها
وشوق كل شوي تشوف القرصه وتحط عليها مرهم
راشد : انا بدق على عيسى بشوفه وينه
دق راشد على عيسى اللي خبرهم انه حجز تذاكر للمتحف واتجهوا كلهم هناك .. عقب راحوا يتمشون وبعدها تعشوا وخذوا صور تذكاريه .. وردوا الشقه
راشد راح لشقته وهو ضايق خلقه .. استانس معاهم وكان هاليوم مميز بالنسبه له ..
ام عيسى ووسوالفها اللي ماتنمل وخفت طينتها
عيسى كان يضبط لهم الطلعات وكان حبوب ومافي منه
بدر اللي كان يذكره باخته فرح الصغيرة
وشوق .. اللي طول الوقت كانت تضحك ومستانسه مع انها في البدايه كانت مستحيه لكنها خذت على الوضع ..
الصورة كانت تضم شوق وام عيسى وعيسى وبدر .. وكان راشد يصورهم
في الدمام
السعوديه
الساعه 9 الليل
بوعبدالله : الحمدلله زين زين انك وافقت تتزوج .. وربي هذي يبغالها عزيمه كبيرة
عبدالله : هههههه شدعوه يبا . هالكثر انا مثقل عليك
بو عبدالله : الا قعدتك من غير حرمة ولا عيال هي اللي متعبتني
عبدالله بقبله : بس قوليلي موافقه يانور وانا مستعد اخطبج من باجر
عبدالله : زين يبا تبي شي انا ماشي ؟؟ .. الا وين فراس ؟
بو عبدالله : والله يابوك انا مااشوفه ابد .. كله قاعدن فوق عند حرمته ولا طالع لربعه .. حتى صبا بنيته ماشفتها
عبدالله : انا اقوله اليوم يمرك الغالي ولا يهمك
يله فمان الله
طلع عبدلله عند ربعه بالاستراحه .. وعقب رد البيت وراح لغرفته
ماسك تلفونه ويفكر يدز لنور مسج .. وبعد تفكير قرر يدزلها هالمسج
(( لاتخليني يادوا روحي بنارك .. عطني الاشارة و اجيك كلي تحت امرك ))
وعقب دقايق وصله هالمسج
(( لاتحسب سكوتي لغز صعب تحله .. بعض الهوى ماتخبيه الحروف ))
وبعد ماوصل لعبدالله هالسمج .. حس بالراحه على الاقل عرف ان نور تبيه او عالاقل يقدر يتقدملها من غير أي احراج من رفضها
عقب دزلها
(( ماتدرين شكثر ريحتيني .. حرام عليك .. يوم كامل قاعد على اعصابي ))
وردت عليه نور
(( الهوى يتعب قلوب المحبين .. وشلون تبي قلبك ينام مرتاح ))
رد عليها
(( يامن على كل التفاكير هييمنت .. التعب من يدينك ياهلا به ))
نور
(( ليت الوجع بعروق قلبي ولا فيك .. وليت التعب غلطان ساهي ولا جاك ))
عبدالله
(( مانقدر جذي يانور .. لاتخليني اشوف اول طيارة واجي الحين اخطفج ))
نور
(( ههههههه لا مابي ))
عبدالله
(( فديت اللي تقول مابي انا ههههه .. نور ترى بكرة بكلم اختي سارة بس بغيت اسألج سؤال ))
نور
(( هلا تفضل قول ..! ! ))
عبدالله
((زين يصير اكلمك بالتلفون .. حوليت وانا اكتب ))
نور اللي ترددت بالبدايه ولكنها بالاخير قالتله
(( قول وش بغيت بالمسج ..!! ))
عبدالله
(( طيب .. انتي محجوزة او مخطوبه لاحد ))
نور اللي انصدمت من سؤاله وقعدت تضحك وكانت بتلعب عليه لكن بالاخير قالتله
(( لا .. بس جد ضحكتني هههه ))
عبدالله
(( قلت بعد يمكن .. عارف حظي انا ردي زيي ))
نور
(( طيب يله روح نام .. تصبح على خير ))
عبدالله
(( مم تطرديني يالدبه .. يله كلشي لجل عيونك يهون ))
نور اللي حست انه عبدالله قلب كيانها .. ماتدري شلون هي كانت ترد عليه .. ولا تدري اذا فعلا هي تبيه او لا
لكن كل اللي تعرفه .. انها ترتاحله حييل
وعلى هالتفكير .. غلبها النوم .. ونامت
في نفس الوقت
عبدالله في غرفته ماتوصف فرحته بهالليله .. اول مرة يحس انه حظه بدى يتحسن .. فقده لامه كان صدمه خلته يتخلى عن كلشي وزواج ابوه المتكرر وحياته المشتته بين اب مايحس في اللي بقلبه او ام راحت عن حياته وماتركت غير الجروح
ولما شاف نور وحس انها بتكون له وبحياته يوم من الايام .. صارت تسيطر على تفكيره .. وخلته يفكر باشيا كان ناسيها ورسمت السعاده بحياته المليانه حزن
عبدالله بقبله : باجر بحيل الله ادق على سارة واكلمها وقولها تشوفلي امها .. اذا الاهل موافين مبدأيا اقول لابوي نخطبها رسمي
في الكويت
اليوم الثاني
في بيت بوخالد
خالد : رييييم ريووم
ريم : هلا كاني تعال انا بالمطبخ
خالد : وانا كل ماادورج القاج بالمطبخ .. اللي يقول الحين قاعده تطبخين مجابيس .. بذمتج شنو قاعده تسوين ؟
ريم : احم احم اقول وماتضحك علي ؟
خالد : لا قولي ؟
ريم بابتسامه عريضه : بيـــــــض
خالد : هههههههههههههههههههه اسمحيلي مااقدر لازم اضحك
ريم : هههههه مالت عليك
خالد : انا بعرف انتي اذا تزوجتي شنو بتسوين ؟
ريم : ومنو هذا اللي امه داعيتله .. اصلا مايلقى مثل الريم
خالد : أي والله ولا مثل البيض اللي تسويه ... عاد بتوكلينه ريوق وغدا وعشا كله بيض ههههههههههه
ريم : زين مني ادخل المطبخ وانا بنت ابوي
خالد : واذا قلتلج اهوا يحب بيضج ؟
ريم باستغراب : منو هذا ؟
خالد : ريووم يايلج خطاب .. والله كبرتي ياوخيتي وصرتي مره .. ويه المقرود اللي بياخذج ويفكج مني
ريم : احلف خلوود .. منو منو ؟
خالد : صج ماتستحين .. انا قلت الحين ويهج بيقلب الوان واشكال .. البنات العاده يستحون او اعلى الاقل سوي روحج تستحين عشان اصدق
ريم : ههههههههههه وليش امثل .. يله عاد قول منو ؟
خالد : ممم تعرفين علي ريل سارة بنت عم ابوي ؟
ريم : ايه
خالد : اخوه مشعل
ريم : ممم ميمكن ماشفته .. شنو كان لابس بالعزيمه شماغ ولا غترة ؟
خالد : شنو شنو ؟ أي عزيمه ؟ لحظة ونتي شدراج ؟
ريم اللي توهقت : هاا . .لا شسمه .. مم انا بالصدفه كنت اطل من دريشه المطبخ وشفنا الريايل يدشون
خالد وهو ماسك شعر ريم الطويل : انتي وبعدين معاج على هاللقافه .. متى بتوزين ؟
ريم : لحظه مو بس انا نور بعد كانت تطل
خالد اللي ترك ريم بسرعه : منو ؟
ريم : نــــــور ايي عورتني أأأح
خالد باستنكار : شكو ؟
ريم : انا اللي قلتلها ولا نوروه خوافه
خالد وهو يتنهد : اشوه عبالي اهيا عوبه مثلج
ريم : وانتا شكو ان كانت عوبه ولا لا ..
خالد : مالج شغل ..
ريم : زين يلله قولي عن خطيبي احم احم ههه .. مم شلون شكله ؟ شوف اذا مايشبهه سلمان حان من الحين اقولكم مابيه
خالد : يحليلج .. انتي اذا يشبهه كومار سايقنا المفروض تبوسين ايدج ويه وظهر ..
ريم : ليش بلله ؟ منو يحصل ياخذ وحده بربع جمالي
خالد : بدينا بالغرور .. اقولج انا قلتلج عشان يكون عندج علم بالموضوع .. وانا بكلم ابوي اهوا واهله بيون يوم الخميس الياي تزهبي
ريم اللي حست ان الموضوع جد : ووالله . ؟
خالد : ايه
ريم : من صجك تتحجى خالد .. انا كنت اتغشمر
خالد : هالمواضيع مافيها غشمرة يالدبه .. شفيج ؟هههه
ريم : ماكو شي .. يله روح ابي اكل بيضي احترق بسبتك
خالد : وانا بعد اليوم عازم روحي على الغدا عند بيت عمي
ريم : شوف ان ماكان اللي ببالي صج مااكون ريم
خالد : وشنو اللي ببالج ؟
ريم : انتا حاط عينك على نور ؟
خالد : بسج خرابيط
وطلع من المطبخ وريم تضحك على شكله شلون اعتفس من يابت طاري نور
غير ملابسه وراح يصلي الظهر بالمسيد اللي يم بيتهم وعقب كلم هشام وخبره انه يايهم بالطريج
خالد اليوم كان مهتم بشكله غير .. لابس جينز مع تيشيرت ابيض ولحيه خفيفه لازقه وكان شكله رهيب
ركب السيارة .. وطول الطريج كان حاط اغنيه نوال الكويتيه لقيت روحي .. وهو مستانس ان اليوم بيشوف نور
يتبعـ
13-04-2007, 04:12 PM
رد : عبـــــــ نــــــور ــد الله .. قصة كويتية سعودية ..
المواضيع المتشابهه
منتديات بنات
انا بحاجه لردك
