الجزء التاسع
طلعت من عند هيا عقب ماحطمتني وقالت يانوره تعوذي من أبليس
وخليك مثل ماأنتي لأن النعومه يعطيها ربي ناس وناس خلقها الله دفشه مثلك يعني
مير واروح للحوش واقعد تحت نخلت جدتي
واقعد اغني بصوووت عالي عشان افيض الكبت الي بداخلي
ياليتـــني من بنات اليوم .. وعندي سايق وهنديه
ولساعه وحده وانا ماقوم .. وغداي كيكه وبيبسيه
مير واشوف جدتي وخويها مسيرين علي << اكيد تعرفون خويها الدله
انا:ياهلا ياهلا تعالي تعالي ياجده اقعدي بشكيلك عن حالي
جدتي: والله حتى انا ودي مير اشكيلتس عن شي بس ابيتس تعاهديني امام الله ان هالشي مايطلع
وانا مير تحلالي القعده : افاآآآآ ياجده هون حفرنا وهون طمرنا
جدتي: وين حفرتي فيه لايطيحون الوراعين بحفرتس
انا وامس شوشتي: ههههههههههههه لالا جده اقصد سرررك في بير ماعليك بس علميني انتي
جدتي وهي تمد كريعاتها: والله تخبرين من توفى صنهات مافكرت بالعرس ابد
انا: ايه ادري مشاء الله عليك وفيه الجدي الله يرحمه بس ماخبر اسمه صنهات اخبر اسمه ذيب ماعلينا ماعلينا كملي
جدتي: اي واقولتس وذاك اليوم يوم انا طلعنا للبر واشوف هاك الزول الي يرد الروح مير ويرف قلبي رف
انا: وانا أقول جدتي علامها كل شوي تقصد وتغني اثر العجوز حابه
وجدتي تلمخني بالفنجال : انا عجوز يالمفصوعه ,, انا للحين صغيره والله ان مادفن جمالي غير صنهات
انا: آآح ياجبهتي الله يخلف عليك ياصنهات يالي مدري من وين طلعت ,, ايه جده ومن هذا الي رف قلبك له
جدتي: يااااااااااااااااااوه ياقلبي والله انه كل مامر طاريه ولا مر زوله انه مدري وش يصير فيني مير اكود انه الحَب<< بفتح الحاء ركزو
انا: ويقولون جيلنا خايب وجيلنا فاسد الله العالم من الي جيله خايب ,,المهم ياجدتي من ذا حمستيني
جدتي: واحداً اسمه ناصر
انا سويت تسذا : وشووووووووووووووووووو لالالالالا
جدتي: علامتس تقل كنتس مقروصه
انا: جده يعني أنتي تقصدين ناصر ولد عمي ابو ناصر ماغيره ذاك الطويل المزيون الي خشمه سل السيف
جدتي وتحمر خدودها من ورى البرقع الي تمسسسه الين صار على نص خدودها : اي والله انه هو ماغيره
انا وحسيت بالغيرره تولع :جده لو سمحتي الخيانه ماهي زينه انا حبيته قبلتس شوفيلتس واحد ثاني لو سمحتي
جدتي: وانتي من زينتس تحبينه هو مزيون ومايبي غير مزيونه
انا وتتغارق عيوني من الدموع : جده ليش انا ماني مزيونه
جدتي: لامانتي مزيونه ولافيتس زين ابد وبعدين هو ذاك اليوم قعد معي وسولف ولو انه يبغاتس قعد معتس
انا: جده هذا تراه يصير بناخيتس يعني لاتفكرين فيه كازوج ,, معاد باقي الا هي ,,عجوز هذا كبرها وتبي تتزوج ولد
ماوعيت غير الدله وراها الفنجال وراها زنوبة جدتي تطرد وراي وانا احط رجلي داخل
واضحك بكل سخافه عهدتها بحياتي
الا بستقبالي اخوي فارس توه طالع من الحمام ولابس شورت سماوي وفنيله علاق بيضه
انا .. انصدمت مو متعوده اشوف اخوي بهالمنظر وعقبها غضيت البصر وقلت : حج يا حاج تستروا تستروا
مادريت إلا وفارس يضرب بالارض من كثر الضحك هههههههههههههههههههه
كان يضحك بهستريه
انا اطالعه بكل تعجب شلي يضحكه .. وبعدها راح غرفته وهو ميت ميت ضحك ..؟..
المهم واروح انظف واكرف في هالبيت
المهم اني صرت عدوت جدتي في هاليوم كله
كل ماأمر من عندها لازم تلمخني بحاجه وانا اردها لها بضحك
امي استغربت والبيت كله مستغرب وش عند جدتي كارهتني
<<بلاكم ماتدرون العجوز فصخت الحيا وتبي تتزوج الي انا حاطتن عيني عليه
المهم يوم عاد جدتي زودتها معي كل مامريت المختني
رحت اهددها ,,
انا: جده وقسسسسم بالله لو تحذفين علي شي لاعلم عليتس امي وفارس
امي وفارس كانو جالسين ويطالعون بجدتي
وجدتي قام يتقلب وجهها الوان
جدتي: يابنيتي انا ماغير امزح معتس انتي علامتس نار شابه
انا: اي والله الحين صار مزح واولى ماغير تلمخ بنعال وبالكاسات والفناجيل
فارس: وش فيك وش ماسكه على جدتي هههههههههههههههههههه
انا: اسكت اسكت بلاااوي متلتله خلني ساكته مابي افظحها
وجدتي تقوم يعنني زعلت وراحت الغرفتها وسكرت الباب
فارس: عيب عليك ليش تزعلينها
انا: ماعليك حبة راس وترضى اعرفها جدتي خبز يدي
وتجي هيا تتمخطر مع الدرج
انا: يامرحبا ترحيبتن اسبق من الفار .. ياللي على دربها ثمنين بسه
فارس انصرع من الضحك وامي حطت طرحتها على فمها تعبير بالضحك وهيا زعلت ودرعمت للمطبخ
انا: مير مارظيتي
الجزء العاشر
في صباح يوم جديد
امي: يانووووووووووووووووووير ياجعلتس ماتربحين
انا واركض بحيلي كله يوم وصلت عند امي : هااااااااااااااااااااااااااااااااه
امي : هويتي من راس جبل يالخايسه قمي نظفي المجلس الي برى ونظفي الحوش ونظفي هدوم اخوك فارس يبي يجينا اليوم ظيوف
انا: وقسسسسسسسسسسسسسسم لو اني تماتيك ماقدر اسوي ذا كله نادي بنتس الثانيه المصونه خلها تساعدني
امي: انا لله هالبنت تبيني اذبحها كل ماقلت كلمه قلتي نادي الثانيه انتي علامتس تظارينها
وانا اروح للمجلس عقب مالعنت امي خيري
دخلت وشفت فارس متلحف ببطانيته و نايم استغربت اخوي فارس وش منومه هنا
قلت قبل ماقومه بنظف المجلس المهم نظفت كل المجلس وانا مير اجيكم مسرعه
واجر البطانيه من راسه وهو متجود فيها
انا: حشى حشى علك مو بطانيه هذي,, قم قم بنظف المجلس
هو سااكت
انا: نعنبو ذا الوجه قم بنظف المجلس ناوي تفظحنا انت قم طس نام بغرفتك
والا مافيه فايده ومارد علي ابد
انا واجي فوق راسه وامسك المركى يقالك طاار (طبل) واغني على راسه عشان لاسمع صوتي غصبن عنه يقوم
يا فارس بيتكم مبني .. ومشيده مبانيه
ياعل البيت مايخلى.. ولايدور العزا فيه
يا فارس ردي لي زملي.. من خليلن شرعت فيه
نطحني ناسف الغتره..يقول زملك اخليه
يافارس ياجنين امه.. عسى ربي يخليه
وانتظره يقوم يلمخني بشي والا الولد محطوط على الصامت
ياربي وش فيه لايكون ميت
وانا انوووح عند راسه
انا: يااااااااااااااااااااوه ياويلي ياوخيي رحت غلطه
واقعد اسوي مثل المصاريه والطم على خدودي واقول ماات ماات
المهم لاحظته يهتز وكأنه قاعد يضحك
وانا اقوم اظربه وارفسه : فارس جعلك لصمرقع خرعتني احسبك مت
والا الرجاال زاد هزه من تحت البطانيه وشكله كذا فطس من الضحك ولا عنده نيه يرفع البطانيه
مير وانا ارفع كمامي قلت ياأنا ياهو اليوم
واجي عند رجوله
ومير اسحبهاا وانا أضحك وهو متجود بالبطانيه للحين << تسويها صدق ترى
وانا مستانسه قاعده اسحبه الين وصلته لاعند باب المجلس والا اشوف اخوي فارس توه طالع من داخل البيت
وهو يطالع فيني وهو فاتح فمه
انا بهالحظه عرفت اني جبت العيد
جبت العيد جبت العيد << فرحانه
أجل الي من اليوم ارفسه واسحبه هذا موفارس !!؟؟
وهالرجال للحين متجود بالبطانيه وشكله فاقع من الضحك
اخوي فاارس قام يلطم على وجهه من الفشيله
طبعاً انا انسانه بديهاً حذفت الرجول الرجال
وظليت واقفه مكاني في انتظار حصتي من الضرب
طبعا مسكني من علباي وكم طراق على كم شلوتي بعدها تعدلت ودخلت داخل ولا كأني انضربت
مير يوم دخلت داخل واجي عند هيا وانا دموعي على خدودي
هيا: وش فيتس
انا: هيا ياهيا تكفييين ياوخيتي ظميني
هيا: بسم الله عليتس تعالي تعالي الظاهر ناقصك حناان هاليومين
انا واقعد اون وانا في حظنها وابتسي بتسى عجوز مظيعه دلتها واعلم هيا السالفه كلها
ومير تنقلب هيا راساً على عقل وتقعد تضحك وتضحك وتضحك لين توقعتها تموت من قوة الضحك
انا: عمى خيييير الحين ابيتس عون صرتي علي فرعون
هيا: يااويلي منتس وش انتي مسويه اقسسسسم انك جبتي العيد بقوه ,, اجل لو أقولك هذا منو؟؟ وش بتسوين
انا وافتح فمي لين حسيت فمي بينشق وشهقت شهقه سمعوها الجيران: اماانه هيا منو!!! تعرفينه!! وليش ماعلمتيني ان فيه رجال برى يالنذله يالمفتريه
هيا: نسيت أعلمك ,, البارح جاني فارس وقال علمي أختس لاتطلع ترى فيه رجال نايم برى
وانا قلت له خلاص وانتي قمتي قبلي ونزلتي ونسيت أعلمك والله راح من بالي
انا: الله ياخذتس زيييين الحين فارس بيشك اني مسويه هالحركه عنوه
هيا: ههههههههههههههههههههههه لالا ماعليتس انا بعلمه
انا: طيب من هو ذا الي نايم عندنا!! من خوياه بالعمل ؟؟
هيا: لا هذا ناصر ولد عمي
انا واصرخ براسي كله : لااااااااااااااااااااااااااااااااااااااااااااااااا ااااااااع
واقوم الطم على خدودي واصيح وابتسي وانتف شوشتي من الحره واقول : راح خلاص راح خلاص
لو كان عنده نيه لو واحد بالميه انه يخطبني
الحين ولا صفر بالميه ياويل حالك يانوره يابنت ابوتس
ميرواصقع راسي بالجدار << فعلاً ومن الحب ماقتل
وهيا يوم شافتني وهي تخاف من شكلي وانا أصارخ وابتسي واصقع راسي بالجدران وتجي تحط يدها على فمي
هيا: بنت بنت لاتفضحين عمرك خلاص تعوذي من أبليس وقولي لااله الا الله
انا : لاااااااااااااااااااأله الا الله لااااااااااااااأله الا الله
مير وتناديني امي عشان ازين قهوه لرجال واقوم واتفل على هيا وانزل تحت
وانا كلي أسى وحززن واروح للمطبخ وازين القهوه واضبطها
واحطها عند الباب واطق الباب وانحاش
مالي وجه اطالع اخوي فارس عقب هالموقف
واروح عند جدتي واجلس جنبها واحط يدي على خدي وابكي
وأقول ::
لابوك يالعين بدموعك فضحتيني .. تبكين عند العرب والناس نقاده
تبكين يالعين لاهم ولا ديني .. ابوك يالعين خليتي البكي عاده
ومير جدتي تطنها وتبتسي جنبي
المهم دخل فارس وعطاني نظره الله لايوريكم هالنظره مدري هي استحقار لالا طايحه من عيييينه بقوه مدري عجزت اوصفها
وجاءالعصر وجونا الظيوف الي امي تقول عنهم ,,, طلعو عايلة عمي ابو ناصر
واخذت ساره واريج بنات عمي لسطح
وقعدت معهن سوالف وضحك
ومير فقعت بطونهن من سوالفي ومواقفي << خربتها يوم اني فقدت الأمل من أخوهن
ساره : هههههههههههههههههههههههههههههه آآآه يابطني والله انك نكته متحركه
هيا: ماشفتي شي خني أقولك سالفه تاازه مسويتها هالخبله
اريج : اي اي قوليلنا تكفين والله من زماان ماضحكت
انا: اوماا عاد من زمان ماضحكتن ليه عايشات بحزن لها الدرجه
ساره: لا مو عايشات بحزن بس ياختي ماعندنا احد روحه مرحه مثلكم انتم مره تضحكون من قلب
هيا: تبون تسمعون السالفه ولا لا
اريج : اي اي قولي نبي نسمع
هيا: هذا مره رحنا لسوق انا والأخت نوره ودخلنا محل نبي نشتري منه وهالأخت تتميلح على راعي المحل
المهم يوم جينا نحاسب قال ياخاله السعر كذا عاد نوره بغت تذبحه اجل نهارها كله تتميلح واخرتها يقول لها ياخاله
ابو التحطييييم ههههههههههههههههههههههه
ساره واريج ماتو من الضحك على سوالفنا وانا خلاص نسيت هذا ناصر عقب ماسحبت وجهه بالمجلس بعد بفكر فيه خخخخخخ
المهم غيرنا سوالفنا وقمنا نغني
انا: هااه من تبيني اقصد فيها
ساره : انا انا قولي فيني قصيده
انا: واخطفها بنظره سريعه .. وكانت لابسه ثوب احمر واغني
هيض القلب لباس الحمر .. هيض القلب لباس الحمر
وألعبي وألعبي لاتستحين.. وألعبي وألعبي لا تستحين
لايهمك صغير ولا كبير.. لا يهمك صغير ولا كبير
ساره : ههههههههههههههههههههههههههه اوما عليك اغاني
انا: اسكتي والله اني طيحت سوق الطقاقات وش على بالك
هيا: هههههههههههههههههههههههه اشوى انك ماطيحتي سوق احلام بس
انا: احلام تدق علي كل شوي تبغيني ارد عليها واسوي معها ديتو بس انا رفضت اجل انا اغني مع هذي واااي فشله
اريج : ارحمينا ياهوه طيب غني فيني لو سمحتي احم احم
انا : بيت عمي معروف .. وبيت عمي معروف
وكل المطاعم تدله .. وكل المطاعم تدله
وفطورهن يطلبنه .. وفطورهن يطلبنه
وغداهن تالي الليل .. وغداهن تالي اليل
والزين مايعرفنه .. الزين مايعرفنه
مير وبنات عمي يزعلن علي
وانا أراظيهن بكذا قصيده زينه وهن يرضن ياحليلهن
والله عاد اني استانست مع بنات عمي وراحو البيتهم الله يستر عليهم
وحاولت اني انسى ذاك الموقف الأقشر وقعدت بتالي الليل أصيح لأن خلاص معاد فيه امل بناصر ولد عمي
وقمت اهوجس وافكر ياترى وش يقول عني الحين اكيد بيقول وش هالعربجيه الزاحفه حقت حبتين
مير واتعوذ من أبليس واتفل عليه لين غرقت وجه ابليس بتفالي واحط راسي وانام
الجزء الحادي عشر
في كل صباح تعودتم تشوفوني اشتغل واكرف يعني وش الجديد في هالصبح
غير الكرف والشغل والتمخطر بين ارجاء المنزل
وسبحان الله كل شي في البيت قلبته فوق تحت وحتى تخيلو النمل أعرف ذا نملنا ولا نمل جاينا مسير على نملنا
يعني حتى نملنا عادته واعرف زوله زين ,, ذاك اليوم جتنا نمله حمراء عرفت انها مسيره على نملنا ,, حنا نملنا اسود مو احمر
خخخخخخخخخخخخخخخخ
مر على جيت بنات عمي أسبوع كامل
المهم دقت مرة عمي ام ناصر على تلفون بيتنا
وردت عليها امي وكنت انا جالسه عند التلفزيون واقلب في هالقنوات << ماعندها غير غصب واحد وغصب ثنين
امي: ياهلا والله ومرحبا باأم ناصر وش اخبارك وش علومك
ام ناصر: ياهلا فيك والله ياأم فارس ,, حنا بخير انتم وش اخباركم وش علومكم
امي: والله الحمدالله ماعلينا
ام ناصر: والله ياأم فارس اني داقه ابيك بموضوع
من قالت ابيك بموضوع وامي تاخذ التلفون وتدخل وهي تقول ايه ايه
انا جاني فظووووووول ودي أعرف ام ناصر وش تبي باأمي
طولت امي حاولت اتجسس عليها بس ماااش ماسمعت شي
المهم يوم فقدت الأمل وانا اطلع بالحوش قلت بروح اتنفه شوي ومنها بنظفه
وقعدت عند شجرة جدتي وقمت اغني
يالله انك اتهون كل ماجاني.. تحسن الخاتمه وتزين النيه
اشهد ان الشباب اقفى وخلاني.. راح وماعاد له بالوجهه ماريه
عزتي لك وان جاك ماجاني.. أتقلب ولا ادري وش جرى ليه
صرت ماعاد أسير يم جيراني .. لطري البر والروحات والجيه
مادريت الا وذاك الصوت الي يقول : صح السانك
وانا أطالع الا ولد داج مدججته امه اعطيه حول 13 او 12 مدري المهم انه حول هالعمر يطل علي من بيتهم
انا: انت الحين ماتستحي تطل على جيرانكم وش هالحركات يالورع الداج,,, امك وينها عنك !!
هو: بدال هالمطاالب روحي تستري انتي وهالقميص الي لتس شهر ماغيرتيه
انا: نعنبو هالوجه واجبك من يحط وجهك بالتراب يالتعبان وحافظن قمصاني بعد شكلك مسنتر دايم عند الدرايش يهاالهيس
وقام يقصد ..
مسكين ياعقدن على عنق شينه .. وجهن غبر خرب وهج الالماس
منهو الهبيل اللي تبين تفتنينه.. والله يالولا العقد لقول عباس
وانا اللي ينصفق وجهي .. ياصبااح التحطيماات قلت : حسبي عليك سبعت تحاسيب
الاوله جعلك على هالقصيده تنطرم والثانيه جعلك ماتكمل خطاك والثالثه ثكلتك امك
والرابعه
هو: بس بس السموحه ولا يهمك بنقصد فيك يالمشفوحه << يااااحلو هالكلمه
وانا أقعد واتربع بالحوش واقول : يالله سمعني قصيده سنعه للعن خيرك
وهو يقول :
مية هلا باللي يكحل ثناياه .. اللي يحط الديرمه في عيونه
اللي حدا نهديه من خلف علباه .. والنهد الاخر روحوا يطردونه
انا: يعني مرقعها يقالك حلايا هالوجه,,, مالت على وجهك زييين
وانا أقوم واحذف عليه زنوبة جدتي << لاحد يعلمها تكفون
وادخل داخل وانسدح بالكنبه الي بالصاله
والقى امي مبتسمه ابتسامه شاقه نص وجهها << ماأعرف اوصف
انا: الله يجعل هالأبتسامه ماتفارق خشتس ياميمتي
امي: امين يارب
واشوف امي تنطحن مدري علامها شكل عندها شي بس ماتبي تقوله لي
انا: اي وش عندها ام ناصر كنها تبيتس بموضوع خاص
امي : اي والله داقه علي تخطب
<< تعبير عن شعوري
انا انصفق وجهي وبنفس الوقت حسيت بشعور سعااده اخيراً اخيراً لالا ماني مصدقه
ياربي لك الحمد يالله يارب اني احمدك واش*** اخيراً حققتلي امنيتي اخيراً بتزوج ناصر ولد عمي
امي: وين سرحتي
انا: هااه لاماسرحت بس تذكرت الملابس نسيتها بالغساله ,,
امي: اي روحي طلعيها وش تنتضرين وانا بروح الهيا اشاورها
وانا التفت بقوه على امي : تشاورينها بشنو !!!؟؟ << ستين علامة تعجب على راسي
امي : اي ام ناصر تخطب هيا لناصر
انا بهالحظه انصدمت وحسيت بدوخه << حامل الأخت
تمنيت امووووت ولاتنشق الأرض وتبلعني
امي لاحظت ان وجهي تلون
امي: الله بيرزقتس يابنيتي وعادي ياما بنات تزوجو قبل خواتهم الكبار لاتخلينها بنفستس يابنيتي الله بيرزقتس ان شاء الله
امي فهمتني غلط ,, امي ماتدري عن الي بداخلي ,, امي مادرت انها ذبحتني ,,
شعور بوقتها غريب بس الأكيد انه قهررر
انا: يووه وين راح تفكيرك يايمه لالا بس مستغربه من خطبتهم بهالسرعه
حاولت اصرف امي عشان ماتنتبه لي
ورحت لدورة المياه وانتم بكرامه وقعدت ابكي بداخلها عشان ماأحد يحس فيني
بكيييت وبكيييت وبكيييت وصرخت بداخلي تمنيت اني بمكاان فاضي مافيه ناس عشان اصرخ بصوت عالي
حسيت اني اختنقت بعدها قمت وغسلت وجهي عشان ماأحد ينتبه لي
ابكمل الحين الجزء12
27-02-2011, 05:43 PM
إضافة رد: نوره وجدتها الزاحفه
منتديات بنات
انا بحاجه لردك
