.×(قـبــر يلـمنـي ولا بنــتـ تـــذلـنـي)×.

[سوسو 14]

للكاتبة المبدعه :سامية المقام








الجزء الأول




مرحبا الساااااااااااااااااااااااااااااااااع

هاي اول قصة لي اتمنى انها تعجبكم
يمكن تستغربون من العنوان وخاصة الي كاتبة القصة بنت هب ولد بس هالعنوان مستوحى من احداث القصة



عايلة علي محمد ال(.......)
خليفة(أبو هزاع)
أم هزاع
هزاع (23) يشتغل في الاتصالات مع سلطان ولد عمه
ميثة (19)في جامعة الامارات وتموت على منصور
علي(21)يدرس في التقنية مع خليفة ولد عمه

سالم (أبو سلطان)
أم سلطان
سلطان (23)ربيع هزاع ويشتغل في الاتصالات
ميرة (18 سنة)السنة ثنوية عامة ومحيرنها علي ولد عمها


أحمد(أبومنصور)
ام منصور
سعيد (28) يشتغل في أبوظبي ومتزوج وحدة من معارفهم اسمها روضة وعنده ولدين (أحمد ، فيصل )
منصور (25)
خليفة(21)ربيع علي الروح بالروح ويدرس معاه في التقنية
شمة(20)تدرس في جامعة الامارات

نورة (الله يرحمها)
سالم(أبو سيف ) ما تزوج بعد وفاة مرته
الريم (20) بطلة القصةوتدرس في جامعة الأمريكية
سيف (17) سنة ثاني ثنوي
اليدة مريم أم نورة بعد ما ماتت بنتها قررت تي الشارجة وتعيش معاهم وتربي عيال بنتها لأن أمهم ماتت وهم صغار .



مطر ال (..........)ربيع منصور الروح بالروح

اليدة كانت تسير العين في كل اجازة لكن الريم وسيف ما يروحون عشان جي علاقتهم مب وايد مع بعض بس يعرفون عمامهم وأسمامي عيالهم لأن اليدة كانت دوم ترمس عنهم بس لو شافوهم مايعرفونهم

يوم الجمعة
الساعة 5 العصر
بيت أبو منصور

اليدة كانت يالسة وحواليها عيال أولادها(منصور،علي ،خليفة) لأن كل جمعة يتغدون مع بعض في بيت حد من عيالها والشباب دوم عقب الغدا يلسون مع اليدة يسولفون >>>طبعاَ ميثة لازم تيلس تتأمل حبيب القلب منصور وهو ما مسولها سالفة
اليدة :أقول ولدي منصور متى ناوي تعرس
منصور :أنا أبغي أعرف أنتي متفقة يا أمي كل ما تين عندنا تسأليني هذا السؤال وقبله بيوم أو يومين أمي تحن علي على سالفة العرس.
اليدة :أقول أنتى تتحرى عمرك صغير ولا شوه
منصور : ولا شو
الكل :ها ها ها
عقب شوي حدروا شمة وميرة
علي :هلا والله بلي أحضرو غطوا على كل الحضور
ميرة نزلت راسه لأنه تعرف أنه قاصدنها
وشمة تمت تضحك:أهلين
منصور حب يقهر ميثة وما يدري ليش يستانس يوم يخليها تزعل
منصور : شوفي يدوه هالقمر الي في التلفزيون قصده نانسي عجرم
شمة: أحلى مافيها لون الخصلات الحمر الي مسوتنها خاطري أسوي نفسها
هالوقت كله علي كان يطالع ميرة ومب منتبه شو يقولون وهي مفولة منه عدل
شمة : ميرو بديتي تذاكرين حج امتحانات الثنوية
ميرة:هي متى بس أخلص امتحانات وأدخل الجامعة وأفتك
علي: شوتبيبها الجامعة بعد
ميرة لاوالله عيل شو تباني أيلس في البيت
علي :اسمعي عاد أنا مايخصني أنا في الأجازة بعرس تبغين تكملين جامعة عقب العرس كيفج
ميرة (منحرجة ومحرجة):ومنو قالك أني راضية أعرس في الصيف
خليفة :علو والله أنك متفيج شو تبا في العرس قوم خلنا نطلع أبركلنا
علي: يلا باي(وهو يغمز حق ميرة
اليدة عيل سعيد ليش ما يا هالأسبوع
شمة :كل ما يي تيلس أمي تهزبه وتعطيه محاضرات عشان روضة وهوعشان جي مايي وايد الحين
اليدة :أنا أبغي أعرف هالولد طالع على منو بس ياربي
شمة :الله يهديه
اليدة أي صح نسيت أتصل في هالميانين مايندرى شو مسوين أقول ولدي منصور اتصل في بيت عمتك
منصور :انشاالله
راح دق الرقم وعطا اليدة السماعة بس اليدة قالت محد ايرد عليها رد دق مرة ثانية
تم يرن فترة عجب ردو
:ألو
:ألو سواف
سيف :هلاوالله بروح سواف
اليدة:وينكم ليش ماتردون
سيف :ماماتي أنا والريم كنا في الحوي
اليدة :أكيد تلعبون بالماي أنا أبا أعرف أنتو ما تستحون شكبركم
سيف :والله ماماتي أنا مايخصني هاي الريم
اليدة :عطني ياها مسودة الويه
سيف:ريمو تعلي ماماتي تباج
الريم :هلا والله هلا وغلا هلا بلي بعيد عن العين لكن قريب من القلب
اليدة:أي أي قصي علي بهالكلمتين
الريم أفا والله أنا أقص عليج أنتي الي تقصين على عشرة مثلي
اليدة : المهم تغديتوا
الريم لحظة ماماتي شوي أبا أشوف سواف شو يبى
الريم شو تبغي
سيف أبطلع شوي وبي
الريم :انزين
الريم:ها ماماتي سوري على التأخير
اليدة :شو مستوي فأخوج يوم الجمعة والساعة 6 ويالس في البيت
الريم :ترى أبوي قايلله ماشي ظهره من البيت هذا الاسبوع
اليدة :غريبة ليش
الريم (تستهبل):أسرار عائلية
اليدة :ريمو
الريم : عيون ريمووو
اليدة :شو مستوي فأبوج
الريم:الأستاذ مالهم مال المدرسة متصل في أبوي يقوله أن هو دوم يتمصخر عليه وما يدرس فأبوي أونه عاقبه خلاه ما يطلع و يا ربعه
اليدة :وايد عليه
الريم :ماماتي متى يتين
اليدة والله مادري متى منصور بني
منصور: بعد صلاة المغرب
الريم عيل يدو أخليج الحين يلا مع السلامة
اليدة :مع السلامة

الريم وسيف أتعودوا يزقرون يدتهم ماماتي عشان جي ما يزقرونها يدوه (للتنبيه فقط )
.................................................. ..................................................

سلطان: وأنت حضرتك متى ناوي تخطبها
هزاع :بخطبها بس هي ماتبغي تعرس الحين
سلطان :ليش
هزاع :تقول بعدها صغيرة بعدين صك السالفة هكو رشود ياي صوبنا
سلطان: أنت يوم تشوف رشود ما تحس بالذنب
هزاع: وليش أحس بالذنب أنا أحبها مب يالس ألعب عليها

.................................................. .................................................. ...............................

خليفة :أنت ما تستحي على ويهك وتوك تقول حق البنت أنك تبا تعرس في الصيف ياخي متى بتودر هالسوالف
علي:يا بوي هذيل بس تسلية لين ما أملج تعرف ماأرتاح أذا ما تصبحت بصوت أنوثي
خليفة :الله يخليك أنت بس.. أونه ماروم الى أذا تصبحت بصوت أنوثي ما قول الا الله يهديك بس
علي: انزين الله يخليك فكنا قوم خلنا نيب ميثو من بيتكم ونوديها البيت
خليفة:يلا
ا منصور راح مع يدته الشارجة عشان يوصلها وتم في البيت شمة وميثة
شمة :حو بلاج سرحانة من ساعة أرمسج ونتي مب حاسة
ميثة :ماشي
شمة أكيد تفكرين في روميو
ميثة: آآآآآآآآه أنا مادري أخوج متى بيحس بس يارب
شمة: لا تخافين أمي ما بتخليه ياخذ الى من العالية وما في حد الى أنت المناسبة
ميثة :بس أنا أبغي يحبني
شمة: منصور مستحيل يحب لأنه يعتقد اذا حب بنت يعني مذلة
ميثة : أفـــــــــــــــــــــــــ
.................................................. .................................................. .................................
في سيارة منصور اليدة كل ساعة تنام وترد تسأل منصور كم باقي على ما يوصلون وترد اتنام
منصور :أقول يدو يوعانة ولا عطشانة تبغيني أوقف أشتريلج شي
اليدة :لا ياولدي بس لوعندك ماي عطني ياه
منصور: ان شاء الله وطلعلها ماي من الثلاجة
اليدة :مشكور ياولدي
عقب دقايق رد مبايل منصوروشاف الرقم ارتبك
منصور في نفسه (ايهي هاي شو تبا الحين متصلة عشان يدو تيلس ساعة تهزبني الا كيف ترمس بنات وعندك أخت لازم تخاف عليها وما دري شو )
اليدة :منصور
منصور هلا يدوه
اليدة : تلفونك يرن رد عليه
منصور :لا يدوه هذا واحد من الربع وايد يسولف وأنا مصدع
اليدة :واحد من الربع ها على بالك أنت أنا مادري بمناكركم أنتو يا شباب
منصور :هههه يدو بلاج كلتيني ترى هذا والله واحد من الربع (يارب سامحني)
اليدة: مدامه واحد من الربع رد عليه فبل ما يحترج تلفونك
منصور انشاالله
منصور :ألو
نورة: هلا والله وينك ما ترد على التلفون
منصور:لا ويا الأهل شوي
نورة :أي يعني مشغول خلاص أرمسك بعدين يلا مع السلامة
منصور :مع السلامة
صد على اليدة لقاها نايمة جان يضحك

.................................................. ..............................................

راشد :يلا شباب قوموا خلونا أنسير مكان ثاني تراني مليت من الخاطر
سلطان :يلا
هزاع:أقول شرايكم أنسير السينما
راشد :يلا منزلين فلم أكشن كشخة
هزاع:يلا
.................................................. ..................................................

دخل البيت وهو تعبان واليوم ماطلع لأن منصور ربيعه رايح مع أهله......... راح الصالة لقى أمه يالسة تطالع فيلم مصري جديم
مطر:الله يهديج يمايه أنتي ما تملين من هالأفلام
أم مطر : شو تبغيني أسوي يعني يوم أن الله ما عطاني الا أولاد كله برع البيت يعني ما عندي بنت تيلس وياي
مطر في خاطره(أحين جنها بتبدأ بسطوانتها المعتادة الا تزوج ومادري شوه): أنزين أماه أنا بروح أنام قوميني ساعة سبع باجر دوامي يبدأ ثمان
أم مطر :أنا متى بفتك من القومة من صباح الله خير
مطر :أمايه تعرفين أن نومي ثجيل والمنبه ما يقومني
أم مطر: عيل عرس وخل مرتك توعيك
مطر:أمايه كم مرة قلتلج أنا مب ويه زواج
أم مطر:يابوي أبا أشوف عيالك قبل ما موت
مطر :الله يطول بعمرج يا أمي وانشاالله بتشوفين عيالي بس مب الحين أنا الحين بروح أنام ولا تنسين تقوميني باجر يلا باي وراح باسها على راسه

أبو مطر مات وهم صغار وأمهم ما تزوجت من بعده وربت عياله مطر (25 سنة) ونهيان(23) وناصر(14)
عشان شي هم وايد يحبونها وما يحبون يزعلونها وهي دوم تحن على مطر بسالفة الزواج
.................................................. ..................................................

دخل البيت وهو كاره عمره شافها في الصالة تدرس ولدهم أحمد (ثلاث سنوات )وهي موخية راسها ونازلة خصلة من شعرها على ويها ............. صد الصوب الثاني شاف ولده(فيصل (سنة) يالس يلعب بلعبته راح يلس على الكرسي وحط ولده فيصل في حضنه.
سعيد :السلام عليكم
روضة وعليكم السلام
أحمد: أبوي اليوم الأبلة حطتلي عشرة من عشرة في الأمتحان
سعيد: فديت ولدي الشاطر أقول روضة شفيه ويهج مصفر
روضة (مستحيل أول مرة يسألني شفيني):لا ولا شئ تبغيني أحطلك العشا
سعيد: هي
........................................
روضة: سعيد العشا جاهز
سعيد : انزين
كان بيقوم بس تلفونه رن
سعيد : هلا وغلا.....بخير أنتو شخباركم .......... أقول أنا مشغول شوي أرمسكم بعين .......... يلا مع السلامة
روضة في خاطرها حس على الأقل رمسها من وراي مب جدامي
سعيد :روضة بلاج من ساعة أرمسج وأنتي سرحانة
روضة :ها ولاشي

[سوسو 14]

الجزء الــــــــثـــــاني


سيارة منصور
8:56

منصور:يرمس مطر في التلفون

هي توني منزلنها....... لا شو أنزل فايج أنته ..............أستح عويهك يا الخام ...ها ها ها... مرة ثانية بييبك معاي .... وين ياريال العيوز طول الوقت راقدة .....اشو ...لا لا لا ماظن ....أنت رمسته
هو جي قال ..خلا يولي عنك ......أرمسك بعدين عيل..... يلا مع السلامة




..................................................
في العين مول
9:00

هزاع كان يالس مع الشباب بس هو يرمس بالمبايل بصوت خفيف والشباب ماكانوا منتبهين عليه
هزاع : هلا والله
أهلين:
هزاع: ساعة لين ما تردين وين كنتي
:لا بس كنت مشغولة
هزاع : انزين شحالج
بخير أنت شحالج:
هزاع :شو حد عندج
هي بنت عموتي يالسة وياي بس تريي الحين بقوم:
راشد: يلا هزاع قوم الفلم أحين بيبدأ
:أوي هذا راشد أخوية
هزاع : بلاج هي هو
:تدري لو عرف أني أرمسك بيجتلني
هزاع : يخسي يمس شعرة من راسج محد يروم يقولج شي وأنا حي فاهمة
:فديت قلبك
راشد : ترمس منو أنت يلا ااااااااااااااااا
هزاع:انزين يابوي ياي ذليتوني
هزاع :أقول حبيبي اليازية أنا برمسج بعدين أوكي فمان الله
اليازية : مع السلامة
..................................................
سيارة علي
9:24


علي : خلك يا ريال وين ساير بوصل ميثو وبنرد نطلع
خليفة : ياخي علوه تعبان برقد باجر علي دوام بعد
علي :أنزين بنظهر وبنرد شوية بس
خليفة : مصدع ما فيه
علي :أنزين عيل أشوفك باجر في الكلية
خليفة :أوكي
علي :أزقر في طريقك ميثوه
خليفة:أوكي
خليفة نزل ودخل البيت شاف ميرة وشمة يالسين : شمو ميثة وين
شمة : ياية الحين فوق تلبس عباتها
خليفة : انزين قوليلها
وشوي نزلت ميثة
خليفة :ميثوه أظهري علي يترياج برع
ميثوه :أنزين يلا باي
ميرة : شوفي اذا دريولنا واقف
ميثة:أوكي يلا مع السلامة

ركبت سيارة علي
ظهرت مبايلها بس ما في جارج
ميثة : وقف بنزل بقول حق ميرة شي
علي :انزين اتصليلها
ميثة :تلفوني ما في جارج
علي في خاطره (يت من الله) خذي أتصلي من تلفوني
ميثة :أخاف تعصب
علي : ليش تعصب عيل تروحين وتردين وتلفوني موجود
ميثة : لا عادي بنزل ...ولا أقولك أيب المبايل ما فيه أنزل
..................................................
ميرة راحت تشرب ماي لما مبايلها رن
شمة:ميروو ميروو تلفونج يرن
يت ميرة وردت بدون ما تشوف الرقم
ميثة:ألومرحبا
ميرة : هلا ميثو شو وصل
ميرة: دريولكم ما وصل
علي سحب المبايل من أيدها :أظهري أنا بوصلج
....................................
الشارقة
بيت بو سيف

اليدة:زين بعد نزلتي جان تميتي فوق أحسن
الريم: هلا والله متى ييتي ماماتي
اليدة :جي أنتي تدرين بالدنيا
الريم : جان زقرتيني انزين
اليدة : تدرين أنا ماروم أروح فوق عشان ريلي
الريم :المهم الحمد الله على السلامة
اليدة : الله يسلمج أبوج وأخوج وين
الريم : أبوية كالعادة محد وأخوي يتسبح تو ياي من الملعب
اليدة :وعمتج هند ما يتكم
الريم : لا يتنى أمس وراحت من وقت ولدها زايد مريض

هند عمة الريم عمرها
سنة دكتورة متزوجة وعندها ثلاث أولاد عبدالله 18وسالم 15 وزايد 5 سنوات 39
هي وايد مهتمة بالريم وهي أكثر من صديقتها وهي دايماَ تظهر يالريم اليدة ماتحبها وايد تقول عندها قوية لأنها كانت تعرف ريلها قبل الزواج وهي وايد تعتني بنفسها
..................................................
ميرة : مشكور علي مافي داعي الدريول اللحين بيي
علي : بنو بخليج تركبين يالدريول روحج فليل يلا انا برع وسكر التلفون
ميرة :أوي شو أسوي الحين
شمة: بلاج
ميرة قالت حق شمة السالفة وشوي وسمعت هرنات
شمة : أظهري ميرو يترياج
ميرة استحي
شوي ولا ينفتح الباب : ميرو كم بترياج يلا
ميرة : علي ما في داعي الدريول الحين بي
علي : ماشي ردة يالدريول روحج في الليل يلا جدامي
ميرة بصوت واطي : ياربي استر
مشت وراه فتحلها الباب الي وراه وابتسم: تفضلي
دخلت ميرة وركب هو وحطا المنظرة بحيث يروم يطالعها وهي تتمنا الأرض تنشق وتبلعها
وحطا أغنية تدري أني موت أحبك وقام يغمزلها ويسويلها حركات وميرة نزلت راسها حتى ما قامت أطالع الشارع
......................................
الريم: اشو تعيدين في العين ليش
اليدة :أنا كل عيد أسير هناك
الريم : انزين اتسيرين ثاني يوم ثالث يوم مب تعيدين من أول يوم هناك
اليدة : يمكن تستحون على ويهكم وتون تسلمون على خوالكم
الريم : أحنى نكلمهم كل عيد
اليدة: تكلمونهم شو من مذهب فيكم متى آخر مرة سرتي العين تسلمين على خوالج
الريم: سرت مب العيد الي طاف الي قبله وشفتهم كلهم
اليدة: شفتي عيالهم
الريم : لا كانوا في المزرعة بس كانت هناك شمة و ميثة الي جني ماكلة حلالها أطالعني بطرف عينها السبالة
اليدة: هاي بنت خالج لا تسبينها
الريم : انزين بنت خالي ما قلنا شي
سيف نازل من على الدري : ريمو تعالي شوفوا التصميم الي صممته
اليدة: سير ذاكرلك كلمتين أحسلك
سيف : ريمو تعالي شوفي والله عجيب

الريم كانت وايد مدلعة وفري زيادة على اللزوم وميثة مادانيها عشان دلوعة وايد حتى في الرمسة
وكانت تظهر بفول ميك أب
وميثة أصلاَ نفسيتها خايسة ماكانت اترابع في المدرسة الى الخسفات عشان تكون أحلى منهم وما تتمنى الخير حق حد حتى أخوانها

وقفت السيارة ياية ميرة تفتح الباب عشان تنزل تفاجئت البيت مب بيتهم هذا
....................

سعيد : روضة بلاج أنتي من يومين مصفرة وكلة سرحانة (الحبيب قام يشك
روضة :ها ولا شي مريضة شوي
سعيد : قومي أوديج المستشفى
روضة : لا عادي أنا دوم أمرض ما أسير مستشفى
سعيد رن مبايله في هالوقت لمح اسم الحب نسى روضة وظهر بدون ما يرمس وروضة عرفت وتمت تصيح

سعيد لما كان في أول العشرينات حب وحدة هي ما كانت تحبة بس عشان تتخجج جدام البنات انها تعرف واحد حلو بس هو المسكين حبها ولما قال حق أمه رفضت لأن أبوها مسجون وهي سمعتها مب زينة وغصبته على روضة وتزوجها وماكان يسويلها سالفة دايما َ يرمسها من طرف خشمة حتى يوم خبرته أنها حامل سوى عمره مب فرحان مع أنه ميت من الفرح ويوم كانت تولد كان ميت من الخوف عليها بس سوى عمره عادي وهو ليلة عرسا قالها أنا ماحبج ولا أبيج وأحب وحدة ثانية وبتزوجها ومر على زواجهم ثلاث سنوات وما تزوج بس كان يرمسها وكل ما تفتح معاه موضوع الزواج يتهرب ما يعرف ليش حتى أحياناَ يحس أنه يحب روضة ويحاول يتقرب لاكن هي تجافيه و تحسسه أنه جرحها ولا يمكن تسامحه وتكون معاه بنفس كل زوجة وهو ينقهرمنها ويعاملها بقسوة أكثر بس هو ما يعرف أنها تموت عليه وممكن تسامحة بكلمة وحدة...... و هي ما كانت تعرف أنه كان يحاول يتقرب منها
..................................................
أم سلطان :أقول ولدي سلطان مب ناوي تتزوج
سلطان: شو
أم سلطان:شو بعد شو تتزوج مثل كل الرياييل
سلطان : أماية أنا بعدني صغير
أم سلطان :لا صغير ولا شي شو رايك أدورك وحدة مزيونة وأزوجك إياها
سلطان :مادري
أم سلطان :أنا عندي لك وحدة يوم بتشوفها بتتخبل من جمالها شو رايك
سلطان : كيفج بس أخاف على عمري أتخبل هههه
أم سلطان: سلطان أصطلب قول شو رايك
سلطان : كيفج
أم سلطان: يعني أخطبلك اياها
سلطان: شو اسمها
أم سلطان: حصة
سلطان: حصةأسمعا جديم بس ما علي كم عمرها
أم سلطان :19 شو رايك اتوكل واخطبلك يا ها
.................................................. ...................
ميرة:هذا......................
علي : ميثة يلا انزلي بوصل ميرة البيت
ميرة :وين تنزل علي اتخبلت أنا ما برد البيت روحي معاك
علي :لا تخافين ما أكل................. ميثو أنزلي ولا كف على ويهج
ميثة : أنزيييييييييييييييييييييين
ومشى علي بالسيارة وميرة فيها صيحة بس ماسكة عمرها ما تدري ليش وايد خايفة
علي :بلاج ميرة
ميرة :ماشي ممكن توصلني البيت بسرعة لأن سلطون اذا شافني بيذبحني
علي : يخسي لا سلطون ولا عشرة مثلة أنت خطيبتي وبتستوين مرتي جريب
ميرة : أووووووووف وصلني الحين
علي :انزين أنا عندي كلام أبغي أقوله شو رايج تين تركبين جدام
ميرة لااااااااااااااااااااااااا قول الحين
علي : أنزين أي أنا ورا شو رايج
ميرة : لاااااااااااااااااااااااااااااااا علي الله يخليك وصلني وفكني
علي : آسف
ميرة علبالها يتأسفلها علي الي صار لكن هويعتذر أنه ما يجدر يسكت
وقف في واحد من الباركنات
وشوي ولا تشوفه عندها جان تصيح
علي ما عرف شو يسوي أو بالأحرى شو سوى
..................................................
سيف : كشخة التصميم لا
ريم :زين
سيف: شو زين قولي وايد حلو
الريم سيفو أذيتني وايد حلو ارتحت
سيف : بلاج معصبة
الريم :هاي ماماتي تعصب الواحد أونه بتعيد هناك ونحن مع منو نتم عمتي بتروح مع ريلها صوب أهله في مسافي
وأبوي وجوده وعدمه واحد ويدوه صوب خوالي
سيف: ها ها
الريم:what.s so funny
سيف : أنا متعود على هذا الوضع ................الريم ليش أبوي ما ييلس في البيت
الريم : عشان ماماتي ليش أنت ما تدري ليش ماماتي ما أداني أبوي وخوالنا ما يدانونه
سيف: بلى تدرين أحس أبوي خلانا نكرهم وحنا صغار وهو مايدري
الريم: هم يحبونا بس مب وايد
سيف : خاطري أتعرف على عيالهم
الريم : أنا ما أبغي بصراحة أنت ما تلاحظ كل ما تي يدوه من عندهم تكون تبغي تتظارب ويا واحد فينا أكيد يشيشونها علينا
سيف : يمكن

السالفة أن نورة الله يرحمها كانت تحب سالم لأنها كانت دوم أتشوفه في بيت خالتها في الشارجة لأن كان ربيع ولدهم وهو شافها مرة و أعجب فيها وخطبها لكن أهلها رفضوا لأنهم يبونها لولد عمتها بس أبوها لما خيرها بين الأثنين أختارت سالم فأبوها ما حب يجبرها على الزواج فخلاها تتزوج سالم لكن أخونها ما كانوا راضين ولا الأم فبعد الزواج كانت تروح تزور أبوها وأمها وبعد وفاة أبوها ما قامت أتروح عندهم حتى أخوانها ما كانوا يعرفون عنها شئ بس لو سألوا عنها كانوا عرفوا لكنها ما كانت تهمهم ولما وصلهم خبر وفاتها ندموا وايد وأمها وايد تأثرت فراحت الشارجة تعيش مع عيالها أعتبرتهم عيالها وهم أعتبروها أمهم لكن بعد كانت دوم تنغز أبوهم بالرمسة عسب تضارب وياه..........هو أول أيام كان وايد ينزعج ودوم يظهر من البيت بس بعدين لما تعودعلى أنه يكون برع البيت... فما كان يحتك فيها وايد
..................................................
سعيد : حبيبي اليوم ما أقدر تعبان
سارة : أنا أبغي أشوفك
سعيد :ماروم
سارة : متى بنتزوج ونفتك من الحال الي نحن فيها
سعيد : انشالله
سارة : يالس مع العقربة
سعيد : نورة ما يخصج فيها فاهمة
سارة : ما بطلقها بعد زواجنا
سعيد : وليش أطلقها انشالله ومنو بيربي عيالي
سارة : أنا بربيهم
سعيد في خاطره أنت ما دانينهم : أقول سارة لا تفتحين معاي هذا الموضوع ولا ترى بصك التلفون
سارة : خلاص انزين
سعيد : انزين حبيبتي سارة أنا أرمسج باجر
سارة : يلا تصبح على خير
سعيد صكر تلفونة ودخل البيت لقى ولده فيصل يالس على الأرض ويصيح سار بسرعة عنده
سعيد :شفيك بابا ليش تصيح
فيصل :ريلي تأورني
سعيد : بس حبيبي بس وين تعورك
فيصل وعيونه مليانة دموع يأشر على الركبة :هنيييييي
سعيد راح باس مكان الطيحة :الحين بتستوي زينة حبيبي .
ولم ولده لحضنه
فيصل :بابا أبي ماما
سعيد: صدق ما تستحي الحين أنا يالس وياك من الصبح وأنت تبى ماما
فيصل تم يضحك معنه مب فاهم شي بس كان شكل سعيد يضحك وهو يقول هالرمسة
روضة يت : شفيك حبيبي
فيصل هد أبوه وسار عندها: ريلي تأورني
روضة: الحين تعورك
فيصل :لا
روضة : عيل يلا نسير ناكل مم أوكي
فيصل :أوكييييييييييييي
وطول الوقت سعيد كان يشوف روضة ويفكر فيها شوفيها عيونها ذابلة وويها مصفر ليكون بس عندها فقر دم بس بعد حلوة روضة وايد حلوة الحمل والولادة ما أثر على جمالها بس قلبي ملك لغيرها لو بحكم على روضة كزوجة مب مجصرة معاي مول شالة البيت شل ومهتمة بعيالي ومريحتني لبعد الحدود ومبدية راحتي على راحتها أنا فعلاَ احترمها اذا ما أحبها ....................لا شو أحبها أنا أحب سارة الفرق بين سارة وروضة أن سارة ما يخصها في شغل البيت وأنا أظن اذا مب متأكد اذا تزوجنا ويبنا عيال ما بتهتم بهم شرات روضة لكن شو أقول القلب وما يهوى أنا أموت في سارة لكن بعد موب مستعد أخسر روضة ياربي أنا بعدني أفكر روضة أكلت فيصل وخلصت خل أسير أيلس وياهم
..............................................


علي شو يبا من ميرة ؟ ووين بيوديها ؟
وسلطان بيوافق أمه تخطبله ؟
وراشد اذا أكتشف أن ربيعه يخونه في عرضه شو بيكون موقفه ؟
سعيد حيرنا يحب روضة ولا سارة ؟
والريم شو بيكون دورها في القصة ؟

[سوسو 14]

الجزء الــــــــــــــــــــــــثـــــــــــــــــــــال ث


وأنا من يوم ما غابت
مطيت بحزني ظهر الخيل
ابرحل وابتعد وانسى
مكان فيه طاريها
أسابق صفحة الماضي
فوعرات الخلا فليل
مهاجر بالحزن والغم
أحاول أنسى ماضيها
يخاويني في سماء أرضي
مضويني نجم سهيل
ينور في الفضاء خطي
عن العثرة بلياليها




علي ميرو حبيبي ليس تصيحين شي يعورج
ميرة : وصلني البيت علي الله يخليك لا تسوي فيني شي
على نقع من الضحك حليلها خايفة مني
ميرة أطالعته معصبة :شو الي وايد يضحك
علي :ماشي وراح جدام وقالها : يكون في علمج أنا مب نذل عشان أأذي بنت عمي



وكمل طريجه وهو ساكت
.................................................. ..
سلطان : مادري
أم سلطان شو الحين
سلطان : أتوكلي
أم سلطان فديت ولدي الغالي أنا من باجر بخطبلك اياها
سلطان (في خاطره ) أخاف تطلع عوفة وبتلش فيها أمي كل حد عندها حلو
……………………………….…………………………..
في بو سلطان
9:55

ميرة : أوي سلطان في الحوي أخاف
علي : أنزلي بشوف شو بيقول
ميرة : أي .أنت مينون ولا شو
نزل علي ولا عبرها
وسلطان لما شافها نازله من سيارة علي طلعن ينونه
سلطان : ما شاء الله وايد ما خذين راحتهم الاخوان
علي :بلاك سلطان
سلطان : ليش رادة معاه مب مع الدريول
على :لا والله عيل تركب ويا الغريب ووياي لا وأنا ولد عمها
سلطان :مسودة الوية سيري داخل أنا بعدين بتفاهم وياج
علي : هي ما يخصها أنا ركبتها وياي
سلطان : لا والله روحكم
علي : لاويانا ميثو ما شفت أختك نازله من ورى
سلطان : هي صح .... بس .....ليش ما ردت مع الدريول
علي :أنا ما خليتها ترد مع الدريول روحها في الليل
سلطان :مب روحها البشكارة معاها
علي : لا والله البشكارة معاها حتى لو……. الحين مب الصبح ولا الظهر عسب تأمن عليها .......... هي صح يوم أنت في البيت ليش ما يبتها
سلطان : علو خلاص فكني مرة ثانية أنا بيبها ارتحت
علي : هي .........بعد شي لا تواجعها
سلطان:مسويلي فيها روميو.............. أنشالله بعد أوامر ثانية
علي : لا سلامة راسك فمان الله
سلطان: فمان الله
علي ركب سيارته وحمد ربه أن سلطان ما لاحظ أن ميثة محد
وسلطان سار علطول عند ميرة وقالها مرة ثانية يوم يكون ليل تتصل فيه وهو بيبها
.....................


أما علي فتم يحاتيها
علي: ( ياربي ليكون واجعها بسببي ...أنا أدريبه سلطون وايد شديد يمكن جدامي يكون عادي ويسير من وراي يكفخها أنا لازم أطمن عليها بخلي ميثوه تتصل فيها ......وليش ميثوه تتصل أنا بتصل بس عقب شوي يمكن سلطان بعده عندها)


.................................................. ...................................

بيت مطر
1:00

مطر: أهي صوت شو هذا .................... منو المتفيج الي يتصل الحين:ألو
:ألو
مطر : ها منو
:شو بعد منو أنا منصور حد يتصلبك غيري
مطر: ههه هلا منصور غريبة متصل الحين.......... الا الساعة كم الحين
منصور : وحدة
مطر: أقول حد يتصل في حد الساعة وحدة أسميك متفيج
منصور : هي الشباب..... ما دريت أني مرابع دياية ترقد الساعة سبع
مطر : أولاَ أنا مب دياية أنا ديج ثانيا لمعلوماتك أنا أرقد عشر مب سبع
منصور: ههههههههههه عشر علي أنا
مطر : خلاص تبت ياريال
منصور :الله يهديك ............... أنزين ليكون أزعجتك
مطر : لا حبيبي آمر
منصور : لا كنت أبا أشوف شو تسوي على العموم أشوفك باجر يالديج
مطر:هههههههههه أوكي see you tomorrow
منصور : يلا في حفظ الرحمن
مطر : مع السلامة بعد ما سكر مطر عن منصور سمع صوت باب ينفتح فطلع يشوف منو
مطر:نهيان

ناصر:لا أنا ناصر
مطر : حضرتك من وين ياي الحين الساعة وحدة.... وأنت باجر ما عليك مدرسة
ناصر : لا علي مدرسة بس كنت يا ربعي
مطر: لا والله احلف أنت بس بعدين تعال شو هالريحة
ناصر : ها ........لا ولا شي بس كنا ياسين في الكوفي وفي شباب يدوخون...... فالريحة يت في ثيابي
مطر : شباب يدوخون ها............. هالمرة بعديها المرة الياية ماشي فاهم
ناصر : انشالله
مطر: سرت عند امي
ناصر : هي أول ما وصلت سرت عندها
وقام ناصر بيسير غرفته
مطر: ناصر متى امتحاناتكم مال آخر السنة
ناصر صد عليه :عقب ثلاث أسابيع
مطر : نبغي درجات ترفع الراس فاهم
ناصر : انشالله وراح ناصر بس وقف نص الطريج وصد على مطر :. أبغي أقولك شي دوم أسأل عمري
مطر :قووووووووووووول
ناصر :الحين أنت وصقر أتمون برع البيت لين ساعة ثنتين وثلاث شمعنى أنا
مطر :لأن نحن ما ورانا شي أنت وراك مدرسة
ناصر عيل صقر لين الحين ما يى وهو وراه جامعة
مطر : صقر ريال وأنت بعدك صغير
ناصر أنزييييييييييييييين تصبح على خير
مطر : وأنت من أهله

ناصرولد متهور وايد ومطر كان وايد يخاف عليه لان أبوه مات وهو صغير عسب جي كان وايد شاد عليه

..................................................


يا ربي أتصل ولا ما أتصل أف بتصل وبتوكل على الله دق الرقم الي سيفة بعد ما طلع من بيت عمه باسم القلب
تو تو وتو وتوو وتو
علي هاي ترمس منو الحين الساعة وحدة
رد اتصل مرة ثانية محد رد عليه في المرة الثالثة وصله صوت ناعم
ميرة :ألو
علي : مرحبا ملايين في ذمتيه ولا يسدن
ميرة :علي
علي :عيون علي أنتي
ميرة والتوتر باين على صوتها : ليش متصل خير في شي
علي : اشتقتلج قلت أتصل في حبيبتي فيها شي
ميرة : علي لا تمشكلني أنا مب ناقصة مشاكل
علي : لا مشاكل ولا شي أنت في الحجرة
ميرة :هي
علي : خلاص عيل سيري أقفلي الباب ومحد بيسمعج
ميرة : علي أنت شو تتحراني
علي: أقفلي الباب أول بعدين أنا متصل أقولج شي وأصكر
ميرة :علي أخاف سلطان يدخل عليه
علي :بقولج سالفة وبصكر والله
ميرة : لحظة وراحت تقفل الباب
ميرة : يلا قول بسرعة
علي :بلاج فديتج محد بيسمعج
ميرة : عليييييييييييييييييي
علي: أولا شحالج
ميرة :بخير يلا قول
علي :قبل ما أقول أنا ماحب أرمس حد ما يسويلي سالفة رمسيني عدل ولا بزعل وبصكر
ميرة : خلاص قول
علي :كنت خايف عليج قلت أتصل أطمن شو قالج سلطان
ميرة : هزبني وقالي آخر مرة أركب وياك
علي : الهيس قالي ما بصرخ عليها.............. ميرة سوري والله
ميرة : عادي علي لا تفكر
علي :متلوم فيج
ميرة : لا تفكر قتلك
علي : أكيد
ميرة : أكيد الحين ............هاي السالفة
علي :هاي السالفة الأولى أما السالفة الثانية
ميرة: شو
علي : أسمعيني ولا تصكين التلفون
ميرة : يلا قول
علي : أحبج
ميرة ذابت وعلي استغل هالفرصة: أموت فيج أنا بدونج ما أروم أعيش أشفقي بحالي حرام عليج
ميرة: علي خلاص
علي: ليش فديتج خليني أعبر على الي في قلبي
ميرة : تبغي تتهرب: علي شوالسالفة الثالثة
علي: انزين بطوفلج اياها ............ الثالثة اقتراح شو رايج كل يوم لما الكل يرقد تكلميني
ميرة : علووووووووووووو صدق ما تستحي تبا تخربني
علي :ههههههه فديتج عادي والله ما بقول حق حد
ميرة : مستحيييييييييييييييييييييييييييييل
علي : أنزيييييييييييييييييييييين مسجات
ميرة :لااااااااااااااااااااااااااااااا
علي :انزين خلاص (ومد بوزه)
ميرة:علي فديتك أفهمني
علي : ما بقول شي بشكي همي لله...................... هي صح ترمسين منو كنتي
ميرة : ودوم
علي : ترمنسينا ساعة وحدة شو عندج
ميرة : تسألني عن سؤال
علي : هيييييييييييييييييييييييييييييييي
ميرة ابتسمت : يلا عيل تصبح على خير
علي : وأنت من أهله
صكرت ميثة التلفون وهي ميتة من الضحك :والله أحبه أحببببببببببببببببببببببببببببببببببببه
......................................
بيت مطر
7:00
ثاني يوم الصبح

مطر : صباح الخير
ناصر : هلا مطر صباح النور
مطر : شصبحت فديتك
ناصر مستغرب: بخير يعلك الخير
مطر : تريجت
ناصر: لا ما أتريج
مطر : قوم أتريج وياي
ناصر : لا ما شتهي وبعدين متأخر على المدرسة مرة ثانية
مطر : انزين أنت بتروح الحين
ناصر:هي بغيت شي
مطر : لا بس أباك تشد حيلك
ناصر :انشالله
مطر: ناصر اذا جد قسيت عليك فها لمصلحتك أنت تدري بمعزتك عندي أنا أعتبرك ولدي
نهيان :وأنا بعد أعتبرك ابوي فديتك والله يا أصيع أبو في العالم
مطر : يا الهيس أنا أبوك أنت يا الشحط أنا ناصر ويلا يلا تطلعلي أنت بعد
نهيان :هههههههه ناصر شوتبا في ويع الراس والمدرسة سير أرقد أحسلك
مطر: لا أبويه يكفي ثنين فاشلين أنا ناصر أبا يكون أحسن مني ومنك
نهيان : ها وما شالله شو تبا يطلع دكتور
مطر : والله عاد كيفه الجامعة بخليه على كيفه يختار أنا أهم شي عندي ييب نسبة و يدخل تخصص زين
ناصر : انشالله بدخل التخصص الي تباه بس أستأذن منكم بروح وايد تأخرت مع السلامة
مطر ونهيان : مع السلامة
أم مطر: شو راح ناصر
نهيان : هي راح ولدج حبيبج
ام مطر: وأنت شو مب ولدي
نهيان : بلا بس من ولد لين ولد يفرق مطر العزيز الغالي وناصر الدلوع وانا وحليلي ضايع في الطوشة
ام مطر: اسميك أنت بعد..................مطر الى شحال منصور
مطر: بخير
ام مطر : ما شاء الله عليه ولد زين ولد ناس محترمين وحليلها أمه ما تقصر تتصل دوم فيه
مطر: هيييييييييييييييييييي
أم مطر: الى اخته أنخطبت ولا لاء
مطر (بعصبية ): وأنا شعرفني
أم مطر : والله بنت طيبة تستاهل كل خير (وكانت تنغز مطر بالرمسة)
مطر قام بعصبية مالها داعي : أنا رايح
أم مطر : ويدي بلاه هذا
نهيان : تراج انتي الله يهداج أمي الولد ما يبغي يعرس وانت كل يوم تمدحيله في بنت
ام مطر : والله الحق ينقال وهذا مطور انا وايد مسوتله سالفة لو وحدة غيري جان غصبته ولا سوتله سالفة لكن قلبي طيب شو أسوي
نهيان ضحك على أمه لانه يدري لو أنها تروم تغصبه جان غصبته لكنها تعرف أن مطر مستحيل حد يغصبه على شي ما يباه
ام مطر : وانت بدل هالابتسامات الي مالها داعي استوي أحسن من أخوك وعرس انت بعد مب صغير
نهيان : والله يا أماية ياريت بس اخاف اجرح مشاعر البنات الي يموتون عليه ههههههههه
أم مطر: فقدتك انت والبنات الي تعرفهم ما عندهم سالفة يعرفون واحد مثلك
نهيان : ضحك على أمه وقام باس راسها :يلا تأخرت أنا
أم مطر: فحفظ الرحمن

[سوسو 14]

................................
بيت سعيد
7:30

سعيد يطالع المنبه :الساعة سبع ونص يعني خلاص روضة لبست أحمد والدريول وداه ....غريبة ليش ما رجعت الحجرة خلا أسير أشوفها أخاف فيها شي وبتلش ....صدق ما استحي أبتلش أونه بس صدق قمت أخاف ما أسمع صوت لو هي برع جان عالأقل سمعت صوت حركة أوووووووووووووووووووف انا بسير أشوفها ....... ولا أقول خلا أتلبس اول وبعدين وأنا طالع بشوفها عسب ما تظن أني مستهم عليها

:اووووف منو المتفيج الي متصل الحين
: ألوووووووووووووووووووووو
: صباح الخير حبيبي
: منو حبيبج بعد
.................................................. .................................................. ................................
طلع من الحمام وتلبس و لبس غترة وعقاله ولبس ساعته بعين شاف ساعته ثمان الا ربع هاي وين ليكون عند فيصل تعطر وشل بوكه ومفاتيحة والمبايل وطلع من الغرفة راح غرفة فيصل فتح الباب شوي شوي لقا المكان ثلج دخل داخل عدله لحافه وباس راسة وظهر يا ربي هاي وين ليكون راحت مع الدريول تودي أحمد بس ما شفتها تلبس عباتها يمكن يوم دخلت الحمام .......... حتى ولو شقى تروح بدون ما تقولي .............
لو طلعت رايحة وياه لأدبها عدل...... عيل تروح بدون شوري ...... نزل تحت يمكن تكون تحت لقاها يالسة بنص الدري وحاطة راسها بين ريلها تقرب منها لين ما وصل عندها نزل لين مستوى راسها
سعيد : روضة
روضة : وهي على حالها :هلا بغيت شي
سعيد : لا شفيج
روضة : ما شي فيني رقاد
سعيد : انزين سيري أرقدي داخل
روضة وهي على حالها : انزين رايحة الحين
سعيد :روضة أرفعي راسج
روضة : سعيد والله ما فيني شي روح الدوام عشان ما تتأخر
سعيد :قتلج أرفعي راسج لا تخليني أعصب عليج
رفعت راسها
فتح عيونه متفاجأ : تصيحين ليش
روضة: ما شي شوي تعبانه
سعيد: قومي أوديج المستشفى
روضة : لا مافي داعي شوي بستوي زينة
سعيد:أنزين على الأقل روحي أرتاحي في الغرفة
روضة : انشالله الحين بقوم
سعيد تابعها بعيونه لين ما دخلت الغرفة وبعدين ظهر ما يدري ليش حس بنغزة
روضة أول ما دخلت الغرفة رن مبايله راحت أترد علية :ألو مرحبا ....هلا والله بروحي ....ههه............. .فديتك والله محد يسواك ...............أحلف أنت بس .....هههههههههههههه......هي ظهر قبل شوي........... .تعال يلا أترياك..........في وداعة الله
.................................................. ...........................................
مريم : ما عرفت صوتي زعلانة أنا حد ينسا حبيبته مريومة
علي : فديتج والله راقد ما أنتبهت على هالصوت الحلو
مريم : بغيت أقومك حق الجامعة أتلبس واتصل فيني
علي : من عيوني يا عيوني أنتي
بعد ما سكر علي ابتسم باستهزاء وراح يتلبس
(علي صح كان يحب ميرة ويموت عليها بس كان مثل كل الشباب يرمس بنات وخليفة ياما نصحه يودرهم ويقوله أنه بيندم بس هو يقول أنهم تسليه لاغير)
.................................................. .................................................. ...................
سلطان طالع من البيت ورايح الدوام نزل استار مارت ياخذله شي يشربة لأن طلع من البيت متأخر فما كل شي
عقب ما خذله الي يباه وخذ حق هزاع بعد حاسب وظهر وهو ظاهر حدرت بنت متحجبة بس حاطة فول ميك أب
سلطان في خاطرة : بسم الله وين رايحة هذي الصبح ولا بعد متحجبة...... أونها عاد ) ابتسم في ويها جان تخزه خزة ضحك بصوت عالي وظهر (ياله على المحترمه ).
.................................................. .................................................. ..........................
فتح الباب ودخل ما حصل حد : توها تقول أنا أترياك خريطة تم يزاعج :روضة رواضي رواضي
روضة :هلا هلا هلا والله
سالم : هلا أونه أنا زعلان من متى ما يتي العين جنة ما عندج اهل هذا سعود منسنج حتى أخوج التوم
روضةفي خاطرها (ليتكم تعرفون كيف حياتي يا سالم )
سالم : حو الأخت وين سرحتي حتى ما سلمت عليه
روضة : موجودة تعال سولف وياي من زمان ما سولفنا...... الى شحال مريومة
سالم : ههههههههه مريوم روحها فلم حاشرة البيت بالأغاني وتيول قامت تيول أحسن مني
روضة :ههههههههههههههههههه سوالف والله هالبنت
وتموا يسولفون مع بعض
سالم هذا أخو روضة التوم وهي عندها أخو أكبرمنه أسمة خالد ومريم هذي بنته الوحيدة عمرها ست سنوات بتروح صف ثالث وهي دوم مع عيال خالتها الشباب عسب جي كله تيول وتحب سوالف الشباب ,وأخت أصغر منها أسمها وديمة وهي ربيعة ميرة الروح بالروح
.................................................. ........
في مدرسة سيف
11:00

سيف في المدرسة عندهم الحصة الخامسة
سيف : ميود قوم نظهر الأستاذ غايب ثاني ثنوي بنات برا يالسات
مايد : يلا يمكن تشوف العاشقة الولهانة سهيلة
سيف: الله يلوع بجبدك مثل ما لوعت جبدي خا طري أعرف أنا هاي حلجها ما ينطر من كثر الابتسامات
مايد :ههههه
ونزلو وقفوا تحت مبنى البنات بعد مبنى البنات في دجة يالسين عليها البنات
سيف :أف هاي أهني قم أنروح هكو علو صوب الحديقة
مايد : يلا
سيف : ما قلتلك كتبت رقمي على يدار الصالة الرياضة
مايد : يوم أقول مينون الحين بتتصل فيك
سيف : خسي والله اذا أتصلت بتشوف شي ما شافته في حياتها
مايد : عيل ليش حاط الرقم
سيف : عسب البنات لكن هي لااااااااااا
.................................................. ............................
في الجامعة الامريكية


ريم : حمدو بلاج مويمة اليوم
حمدة : صقر زعلان
الريم : بلاه بعد هالدلوع
حمدو : حرام عليج معاه حق
الريم : أسمحيلي حمدو ولد عمج وايد يتشرط ما قلتيلي ليش زعلان
حمدو: عشان سالفة العرس
الريم : يوم أن معاه حق عيل وافقي ليش مأجلة هالجد
حمدة : أحس عمري بعدني صغيرة
الريم : حليلج يالياهل بعدج ترضعين
حمدة : هههه ريمووووووووو عاد
.................................................. .................................................. ..............

في حصة العربي سيف يالس مع ميود وداقين سوالف والمس بعدها ما يت
مرة وحدة دخلت وحدة معصبة وتصكر الباب بالقو
مس : السلام عليكم
الصف : وعليكم السلام
مصطفى (مصري): مس حتوزعي الأوراق
المس : اسكت ( هالأبلة هفات )
الشباب : نقعوا من الضحك
مس: ولك أنتوا ما بتستحوا مافي واحد فيكم فيه ذرة حياء وفي وجه بريق كراما ولك شو هالعلامات وما بتستحوا تسألوا عن الامتحان كمان
الشباب كل واحد ميود ضكته وسيف يضحك ويطالع مايد : عشان المس ما تشوفه
مايد حليله متورط يقوله صك حلجك أضحكني زيادة جي ( هو ما كان يروم يضحك لأنه مجابل المس
سالم : مس
المس : اش لما الكبار بيتكلموا الصغار يخرسوا فاهم
هني مايد ما أستحمل ونقع من الضحك في ويه المس
جان تخزه هايج الخزة

.................................................. ..
سلطان كان ظاهر من الدوام شوي ولما رجع الدوام شاف البنت الي شافها في ستار مارت يالسة تدفع الفاتورة
وهي طالعة يته فكرة الأخ سوا عمره مركز في المبايل ويمشي..... ليش ما يقوم يدعمها هيج الدعمة
البنت : أي أنت ما تشوف عمي
سلطان : بلاج
البنت : عنبو ذا الويه الي لك....ما تستحي ولا تخيل ترد بعد غلطان وزعلان صدق الي قال طرطور ويتشرط
سلطان فاتح ثمه الله وكبر مقواها والله لو مب بنية لهفيتها كف السبالة
ولما سار مكتبه يته ضحكة جان يضحك (صدق قوية أبوي هاي ما ينخاف عليها عن عشر رياليل بس دلاعة السبالة والله لو مرتي جان ظويت الخيزرانة على ظهرها الخامة)
.................................................. ........
الساعة 2:00
بيت سعيد

سالم : يلا عيل بستأذن أنا
روضة : تم تغدى ويانا
سالم : مرة ثانية انشالله
اشوي ودخل عليهم سعيد : السلام عليكم
سالم: هلا والله .الله حية النسيب
سعيد:أهلين علومك
سالم : طيبة والله العلوم من صوبك
\سعيد : الحمدالله
سالم :اترخص أنا وايد تأخرت
سعيد :وين وين ما شي تيلس أهني على الغدا
سالم والله متأخر ومواعد ريال قلت أمر على رواضي بالمرة مدام هيه ما تي ولا تسأل
سعيد : ما يخصها هي أنا الي مشغول بس وعد بني هذا الأسبو ع
سالم : انشالله برخصتكم عيل
وسلم على سعيد وروضة تم لاوي عليها ساعة
سعيد حس بإحساس غريب يمكن الغيرة ما يعرف ( بلاني انا هالأيام شكلي بديت أحبها لا شو أنا من أول أعزها وأحترمها لكن حب لا )
.................................................. .................................................. ..............
على الغدا بيت أبو سلطان
أم سلطان : سلطون أنا كلمت العرب اليوم وقالوا بيشاورون البنية
سلطان : ليش يشاورون البنية بعد
أم سلطان : يالله بالستر وليش ما يشاورونها هي بتعرس ولا هم...... بعدين أسمع هاي وحيدة اهلها وأبوها وايد يحبها ويدلها ليكون تزعلها وتفشلني جدام العرب
سلطان : وليش من أول ما قلتيلي أنها وحيدة
سلطان : ليش بلاها الوحيدة :انشالله
سلطان : بزية وأنا ما أقهر أتعامل مع وحدة ياهل
أم سلطان : ودي سلطون أصطلب أحسلك ناوي تفشلني جدام الناس ولا اشو
سلطان : حاس بوزة وسكت
.................................................. .................................................. ...............
الساعة 3:00
بيت نورة (الله يرحمها )

اليدة: ميري ميري ويع
ميرة : نعم ماما
اليدة : نعامة ترفسج قولي آمين يلا حطي غدا
ميري : راحت وهي تتحرطم على اليدة
سيف يالس في حجرته يطالع التلفون الي يرن يحاول يتذكر الرقم بس مب عارف رقم منو هذا
سيف : حليله نقع الريال
سيف : الو
: ألو مرحبا
سيف من سمع الصوت عفس ويهه
.................................................. .................................................. ........................
بيت بو خالد (الي هو بو روضة )
الظهر والناس كلهم راقدين ومريوم حاشرة البيت بالأغاني وتيول الحبيبة تراها يويلة ما تشوفونها بنت الصراحة أنا أنصدمت منها يوم شفتها تتحدا الشباب ولا كل يوم عندها ربيع طايفة الأجانب الأخت )
وديمة:أف مريووووووووووووووووووم حشرتينا خفي الصوت
مريم:انزييييييييييييييييييييييين العصربتفتكين مني بروح بيت خالو مريم
وديمة:أحسن بعد............... الى شخبار عبود
مريوم : وع خلاص ما حبه الحين انا ربيعي حمد
وديمة : منو حمد العامري
مريم : لا هذا مغني انا ربيعي حمد الأصلي كله ايلس عنده في الباص
وديمة : وحليله عبدالله خلاص ودرتي
مريم : هي وحليله بيلسه عندي بعد
وديمة : هههه وعبيد مسكين
مريم :هي وحليله بيلسه بعد عندي
وديمة : وعبدالرحمن
مريم : وع عاد هذا ما دانيه
وديمة :ههههههههههههههههههههههه
وظهرت فوق

(هذيل الشباب كانوا في باص مريوم وهم مب صغار كلهم صف أول وثاني عدادي وهم من نفس الفريج وهي عاد ربيعتهم ودوم تيلس معاهم في الباص وهم عاد أونه يحمونها.........................)

.................................................. .................................................. ......................................
نهيان ظاهر من الجامعة مع ربيعه راشد
راشد :وين رايح
نهيان :رايح البيت
راشد: تعال وياي تغدى في بيتنا
نهيان : لا وين ياريال ما روم
راشد :يلا العيوز زعلانة عليك تقول ما تنشد عنها مول
نهيان : اذا جي عيل بنروح

(راشد هذا هو ربيع نهيان وايد وهو عايش مع امه بروحهم لان أبوه متوفي عسب جي نهيان ما يستحي يروح بيتهم لان ماعندهم بنات وهو كان وايد مع أم راشد وكان يعتبرها مثل امه ويزقرها اماية ودوم يروح ييلس معاها و أحياناَ يظهرون ثلاثتم مع بعض واذا حد سال ام راشد كم ولد عندج تقول اثنين مب واحد )
.................................................. .................................................. ......................................وصلوا بيت أم راشد ونزلوا الشباب ودخلوا البيت
راشد : أماية أماية تعالي
أم راشد : ها بوية وشافت نهيان
نهيان تقرب منها وباس راسها : مرحبا ملايين في ذمتية ولا يسدن
ام راشد :دزته بعيد : لا تسلم عليه زعلانة عليك لا تسال ولا تنشد عني مسود الويه
نهيان :هههههههههههههههه مشغول والله أماية وبعدين أستحي كل يوم اي
أم راشد : وابويي من كثر البنات الي في البيت تستحي
نهيان : لا بس بعد كل يوم داق ويهي وياي
أم راشد : عيل خلاص أنا بعد ما بخلي نهيان يحدر بيتكم تراه هو بعد يستحي كل يوم يدق ويهه
راشد : هي والله أماية وايد أستحي ههههههههه
نهيان : هي ما علي اتفقتي انت ورشود عليه ها
راشد : هي هي خلاص ما نباك اظهر
ام راشد : رشود ويع اصطلب استخفيت انت ولا شو
راشد :هههههههههههههههههههههه اتمصخر أماية
ام راشد : مصخرتك مثل ويهك كله ولا نهيان
نهيان :هي أماية قوليله
ام راشد :هي هذا العزيز الغالي
راشد :ههههههههههههههههههههههه انزين بطوفها انا هالمرة أماية وين الغدا يوعانين نحن
ام راشد :دقايق وبخلي البشكارة تحطه يلا استريحوا
(راشد كان وايد يحب أمه لأنه ماله غيرها وكان ما يردلها طلب وكان بين فترة وفترة يظهرها من البيت عسب ما تمل وأحياناَ نهيان يكون معاهم
راشد شخصية غريبة تخلي الواحد يحبه غصباَ عنه كان حنون لدرجة فضيعة ووايد يحب نهيان وما يردله طلب حتى لو طلب عيونة كان دايماَ يجدم الكل على عمره وكان فيه هيبة غير عن نهيان الخريش يجذب الواحد له وكان غير عن كل الشباب ما يهمه البنات وهل السوالف مع أن ربعه كلهم يرمسون بنات بس هو غير )







كان راقد ومتهني في رقاده فجأة سمع صوت صريخ تحرى أن يتهيأله بعدين حس الصوت يزيد
قام من النوم سعيد وسمع صوت يهال ورد رقد تحرى يصيحون عادي بس بعدين حس انهم يصيحون ومحد سكتهم يمكن روضة تحت: خلا أظهر وشوف شوفيهم وظهر من الحجرة تفاجأ بلي شافه كان وده يصرخ بس تيبس من الصدمة


ظنكم شو بيكون راي أهل البنية ؟
وروضة شو الي خلاها تصيح شو مخبية ؟
ومطر ليش وايد عصب لما طرو شما؟
ومنو هذا الي أتصل في سيف وعفس ويهه ؟ وشو يريد ?
وشو الي خلا سعيد يتفاجأ و يتيبس في مكانه؟
وحمدة وصقر بيتراضون ولا صقر خلاص غير رايه من كثر ما تأجل العرس؟

[سوسو 14]

الجزء الـــــــرابع


تعرف الظلم؟!

لا حبيت شخص مادري عنك...

تعرف الصعب؟!

اذا كنت مخلص والي تحبه غدر بك

تعرف القهر؟!

أنك تسهر الليل والي تحبه عمره ما حلم بك



"نصيحه"

إذا فكرت تحب حب اللي يحبك













الاثنين
3:10
بيت سعيد


سعيد واقف مكانه متيبس وهو يشوف روضة طايحة على الأرض مغمى عليها وعيالها حواليها يصيحون
سعيد بعد شوي حس أنه واقف مكانه بعده منصدم وبسرعة راح عندها وشلها ووداها الغرفة نومها على السرير بعدين حط عطر على الكلينكس وتم يحركه عند خسمها
روضة بدت تفتح عيونها شوي شوي سعيد ابتسم ومسح ايده على شعرها :اشفيج رواضي
فجأة روضة : اتذكرت الي صار وتمت أتصيح وسعيد يحاول يهدي فيها وهي تصيح آخر شي سحبها لحظنه وهي تمت أتصيح وما هدت .......................... سعيد يحسها تحاول تبعد عنها شي ما تيغي تتذكره .................................................. ...
بيت ابو الريم
الشارجة
:سيف : نعم
المتصل: سيف ال...... موجود
سيف : لا الشيخة الرقم غلط
وصكر على طول
فهالوقت دخلت الريم الغرفة تقوله عن الغدا شافت ويه متغير
: بلاك
سيف : هاي ذلت عاري
الريم :منو
سيف : في غيرها العنز
الريم: سهيلة بطي
سيف :هي
الريم: انزين بلاك أنت على البنت
سيف : ذبحتني ولا بعد قايله حق البنات أن أنا أحبها ومعجب فيها ومتخبل عليها بعد

الريم : هههههه وحليلها تحبك
سيف : حبتها الجرادة اليوم تخيلي لاحظت أني من شفتها قمت راحت الحبيبة ولحقتني وين ما انا واقف ولا الحبيب ميود يضحك بغيت أجتله
الريم : انزين رمسها
سيف : تخسي والله يعدين لما البنات بيسألونها شو قالج بتقولهم كلام حب وغزل
الريم :ههههههههههههههههههه
سيف : بلاكم أنتو تضحكون أنتو مب حاسين بالقهر الي فيني
الريم : تراك انت اول مرة أشوف ولد ما يبغي يرمس بنت ولا بعد تحبه ولو قالها تبوس ريله بتبوس
سيف : أنا غير انا ما داني الي تذل عمرها
الريم :انزين من وين يابت رقمك
سيف: كاتبنه في الصالة الرياضية
الريم : مسود الويه يوم كاتبنه ................اتحمل عيل...................... هي صح نسيت غدا
سيف : ابويه هني
الريم :هي تحت


ونزلو تحت ولقوا أبوهم يالس ويا اليدة الريم راحت يلست عن أبوها وحطت راسها على صدره
اليدة : ريمو ويع اعقلي انت مب صغيرة
الريم : ليش يدوه شو سويت
اليدة : عيل حاطة راسج على صدر أبوج قومي عنه يمكن يضيج
أبو سيف : لا عمتي عادي
اليدة : كيفك انا كنت ابا راحتك وصدت ويها وعوت بوزها بو سيف ابتسم (ياله هاي العيوز ما بتيوز عن طبعها )

.................................................. .................................................. ........
سعيد يطالع روضة الي لين الحين في حضنه حسها هدت وختفى صوت تنفسها
سعيد بحنية عمره مامنحها الى لعياله ولسارة : بلاج حبيبي شو فيج
روضة س .سا .,....لم
سعيد :سالم بلاه
روضة : سوا .ههيئ حا .حادث
سعيد :انشالله هو بخير لا تخافين الحين بتصل فيه وبخليه يطمنج عليه
شل المبايل ودق على سالم
تم يرن بعدين
: ألو السلام عليكم
سالم :وعليكم السلام هلا والله
سعيد : وينك ياريال أنت
سالم : أنا في الطريج
سعيد : يعني أنته بخير
سالم : هههههه أكيد هاي رواضي نشرت الخبر وين هي عطني ياها
سعيد : شو قايلها أنت
سالم :ههههههه هي أتصلت فيني قالتلي أنت وصلت قلتلها لا بعدني سويت حادث وبعدين صكت علبالي أنقطع الخط
سعيد : أنزين هكي خذها طمنها عليك
وعطاها المبايل وتمت ترمس وبعد ما خلصت بندت المبايل وعطته
سعيد :روضة ألبسي عباتج
روضة : ليش
سعيد: ألبسي وخلاص
وطلع من الغرفة
وبعد شوي لقته يالس يلعب بالسويج
: سعيد :يلا روحنا
روضة : وين بنروح
سعيد: في السيارة بقولج
روضة : والعيال
سعيد : ما بنطول بنخليهم مع البشارة يلا
روضة عقدت حياتها وراحت وراه
في السيارة
روضة تمت ساكتة لين ما وصلوا عند المستشفى ونزل سعيد وهي تمت فاتحة عينها أطالع سعيد
سعيد : فتح بابها : ادري لو عرفتي أنا يايين هني ما بترضيين تين يلا أنزلي
روضة نزلت وهي ساكتة المشكلة أنها تعرف شو فيها وها الي يخليها طول الوقت سرحانة
دخلت عند الدكتورة وفحصت عليها
:مبروك أنتي حامل
روضة اكتفت بابتسابه باهته
قامت من السرير وعدلت عباتها وطلعت
سعيد : شو قالولج
روضة : ما شي يلا نروح
سعيد : شقى ما شي أنا بدخل عند الدكتورة
روضة : سعيد بقولك في البيت
سعيد عقد حياتة بس هدها وراح للدكتورة وقالتله أنها حامل في الشهر الثاني
استانس سعيد وايد
وطلع وهو شاج الحلج
:يلا نروح
.......................................
أم سلطان : سلطاااااااااااان ......سلطااااااااااااااااان
سلطان :هلا أماية
أم سلطان: مبروك ابوية وافقو
سلطان لله يبارك فيج كنت متأكد أنهم بيوافقون حد يرفضني أنا
أم سلطان :ههه ما قول الى الله يهديك وهالله هالله ببنت الناس
سلطان : بنت الناس في عيوني يامي
أم سلطان : بدينا من الحين
سلطان :ههههههههههه شكلها العيوز بدت تغار

..................................................
في سيارة سعيد


روضة كانت سرحانة وسعيد استغرب منها بلاها هاي بدل ما تفرح
سعيد :روضة بلاج
روضة :ها ولا شي
سعيد : عيل بلاج مويمة
روضة : لا بس يالسة أفكر في سالم ما يندرى وصل ولا لاء
سعيد : أتصلي فيه عيل
روضة : لا بتصل بعدين
سعيد وهو يبتسم : هالمرة انشالله بنت
روضة :ابتسمت وطالعته : شو بتسميها
سعيد : اذا بنت على أماية شيخة
روضة : واذا ولد
سعيد : اذا ولد مادري يمكن أسميه عمر بس انا حاسس أنها بنية
روضة : كله واحد
سعيد : صح كلهم عيالنا

.................................................. .................................................. ......
بيت بو هزاع
4:00


دخل البيت وهو معصب أنا أراويها السبالة مسك هزاع مبايله
تم يرن بعدين شلته
: هلا حبيبي
هزاع : يزوي وينج
اليازية وهي خايفة(بلاه هذا ) : في البيت
هزاع : أدري في البيت بس حضرتج وين كنتي الصبح
اليازية بعفوية : هي ترا اليوم الصبح خالد أخوية قال بيودينا المول عشان نتشرا لأن عرس بنت عموتي قريب وبعدني ما....
قاطعها هزاع : وكيف حضرتج تطلعين من البيت دون شوري ها
اليازية :حبيبي هز...
هزاع : لما أنا أرمس تلمين ثمج فاهمة ولا لا
اليازية :والدموع تنزل على يبهتها بدون ما تحس
هزاع : ومرة ثانية اذا ظهرتي دون شوري والله ياليازية لتشوفين شي عمرج ما شفتيه فاهمة ولا لا
أقول سمعتي صوت قطار الامارات اليديد
اليازية : ل لا
هزاع : عيل أسمعي وصك التلفون
: توتوتوتوتوتوتتو
اليازي كانت تصيح أول مرة هزاع يصرخ عليها جي
حتى هزاع كان يعرف أنها تصيح لكن هزاع معروف لما يعصب محد يكلمه أو يرادده لأن وايد يعصب وما يحس بنفسه
تم مغتاض
: تستاهل محد قالها تطلع دون شوري بس حرام وايد صرخت عليها ولا أقول أحسن عسب ما تعيدها


.................................................. .................................................. ..........
بيت بو خالد
مريم يالسة تطالع تلفزيون
فاطمة : مريوم قومي يلا متى بتذاكرين حضرتج
مريم : أماية ما أبغي بعدين
فاطمة شو بعدين يلا باجر آخر يوم بعدين أجازة يلا حبيبي
مريوم : أوووووووووووووووووووووووووووف
خالد : مريوووووووووووووووووووووووم
مريم : آسفة
دخل البيت سالم ومريم نقزت في حضنه
سالم : هلا والله هلا
مريم : عمي وينك من زمان ما شفناك
سالم : هي والله أنا بعد من زمان ما شفتج من جني متصبح بكشتج هههههههههههه
ودخل الصالة وهو شال مريوم السلام عليكم
الكل : وعليكم السلام
سالم : يلس مع خالد
خالد : مريوم حبيبي روحي يلا ذاكري
مريم : انزييييييييييييييييييييين

خالد : الا شحال روضة
سالم : بخير تسلم عليكم بتي يوم الاربعاء.................... بس
خالد : شو بس بلاك
سالم : مادري حاسس انه فيها شي مصفره ووايد تسرح
خالد : يمكن في شي شاغل بالها ما عليك أنت
سالم : مادري يمكن مضاربة مع سعيد
خالد : لا ما أظن عمرها ما شكت منه اكيد هو حا طنها في عيونه أنت تتوهم ما عليك
سالم : ياريت والله لو يكون كلامك صح وأني أتوهم

.................................................. ..................................
الساعة : 7:00
نهيان يالس مع راشد في بيت ام راشد
نهيان : وينها العيوز ما يت اليوم
راشد :ظاهرة
نهيان : غريبة عيل مب انت موصلنها
راشد : لا بتروح العرس اليوم عسب جي خالتي مرت عليها بيروحون مع بعض
نهيان: عرس من الحين
راشد: بيروحون بيت خالتي بعد
نهيان : هيييييييييييييييييييييييي






بيت مطر
الساعة 8:20

نهيان كان راجع من عند راشد فدخل البيت وشاف امه يالسة راح يلس معاها

الامتحانات جريبة والكل يذاكر مطر كان رايح يشوف ناصر يذاكر ولا لااااااااااا

دخل الغرفة سمع صوت ماي أكيد يتسبح
بعدين راح فتح الدرج وانصدم
معقولة نا صر ......................

.................................................. .............................................

توت توت توت
: أف جن محد في البيت غيري
ميرة : الو
البنت : ألو مرحبا ميرة موجودة
ميرة : هي انا ميرة منو معاي
البنت : انا شمسة
ميرة : :هلا الشيخة بس منو شمسة ما عرفتج
البنت : انا مرة شفتج في العين مول وتبادلنا الأرقام
ميرة ( عرفت انها جذابة بس قالت خلا أشوف شو تبى ) هيييييييييييييييييييييي
شمسة : علومج
ميرة بخير
شمسة : عيل خلا نتعرف على بعض امتحاناتج جريبة ولا
ميرة : لا أنا ثنوية عامة
شمسة هــيييييييييييييييييييييييييييي
شمسة : انزين عندج خوات
ميرة : لا ما عندي
شمسة : وحيدة ولا
ميرة : لا عندي أخو (ميرة والبنت كان كل كلامهم كلمة كلمتين )
شمسة : هيييييييييي أنزين شسمه
ميرة : سلطان
شمسة : (خلاص ما عرفت شو تقول ): أنا بكون صريحة معاج أنا أعرف سلطان من زمان وأحبه وهو يحبني بس من شهر وهو يتهرب مني وقبل كم يوم لما أتصلت فيه قالي انه كان يقص علي وما يحبني أنا مابا منه شي بس الي اباه أنج أطمنيني عليه
ميرة استغربت : مادري
شمسة : انا بتصل فيج كل يوم وانت قوليلي اخبارة
ميرة تمت محتارة بعدين قالت :انزين
شمسة : مشكورة ما عرف كيف أشكرج
ميرة :لا عادي الحين بسكر انا
شمسة : براحتج الشيخة
.................................................. .................................................


ناصر طلع من الحمام وتفاجأ بالشي الي بيد مطر
مطر (وهو يتكلم من ورا أسنانه ) : شو هذا
ناصر : ارتبك ه .ه ....هذا ااااااااا
مطر وهو يصرخ : أقولك شو هذا تسمع ولا أسمخيت
ناصر : نزل راسه
مطر : هذا الي ملهنك عن الدراسة ومخلنك ..... آه خسارة يا ناصر
ناصر ما عرف شو يقول ونزل راسه
مطر : مدام هاي سواتك عيل أسمع طلعة من البيت ماشي ومبايل بسحبة منك من المدرسة للبيت ومن البيت للمدرسة بظهر يا علان بظهر يا فلان ماشي سامع ولا لاء......... ورقعة ويهك مابا أشوفها من تشوفني تفز من مكانك وتنقلع فاهم
ناصر :,,,,,,,,,,,,,,,
مطر : فاهم ولا لاااااااااااااااا
ناصر : فاهم
وطلع مطر ولقى أمه وأخوه
أم مطر : بلاك تزاعج
مطر : سيري شوفي ولدج شومن سواد ويه مسوي
الأم : ويدي شو مسوي بعد
مطر : يتحرى المريلة بالدخان
نهيان وأمه انصدموا ومطر طلع من البيت وكان مسرع ما يعرف وين يسيير
.................................................. ......................................

سارة : أخيراَ أتكرمت ورديت علي
سعيد: والله سوري يا قلبي كنت في المستشفى وأنت تدرين مافي ارسال
سارة :ليش جبيبي شي يعورك
سعيد : لا
سارة: عيل شوووووووووووو
سعيد ( أف تورطنا شكلنا ) : لا بس روضة شوي تعبانة
سارة :أوووووووف بلاها بعد
سعيد : ماشي حا.......حامل
سارة : شوووووووووووووووووووو حامل........... سعيد (تسوي عمرها تصيح ) انت ما تحبني سعيد أنت خاين
سعيد : منو قال ما حبج فديتج أنت الهوا الي أتنفسه
سارة : أحسك تبا ترتبط فيها اكثر و أكثر
سعيد .: يتهيألج حبيبي
وتمت تصيح وهو يهديها لين ما صكرت
سعيد : أف ما بغت ( سعيد معقولة أنا مابا سارة تكلمني وأباها تسكر بسرعة لا مستحيل الظاهر من حنتها جي قلت )
سعيد دخل البيت ما حصل حد طلع فوق لقاها مع أحمد وشكله معذبنها
روضة : يلا أحمد حبيبي قوم عشان ترقد عندك باجر مدرسة
أحمد : مابا
روضة : ياماما قوم لا تعذبني
أحمد : مابا مابا
سعيد : احمد قوم أرقد باجر عندك مدرسة وماما تعبانة
أحمد : بس شوي لين ما يوصل الكبير على الاربعة
سعيد: تسمع الرمسة أنت ولا لاء
أحمد : مااماااااااااااااااااااااااااا
سعيد وهو يصارخ : قلتلك قووووووووووووووووووم
أحمد والدمعة في عينه أنزيييييييييييييييييييييييين
روضة كسر خاطرها قامت وراه وراحت لعنده
.................................................. ......................
يالس مع أمه جان يرن مبايله باسم الغلا كله ابتسم وطلع
:مرحبا ملاااااااااااين في ذمتية ولا يسدن
اليازية : أهلين (بجفا ) .بسير بيت يدتي ممكن ولا لا
هزاع : روحي فديتج
اليازية : باي
هزاع : باي وابتسم بأسف