(في بيت أبوفهد):
دخلت عهود للصاله وسلمت على نجود وأم فهد وجلست معهم تسولف فجأه دخلت عليهم الشغاله وقالت: ماما باباعود في يجي مع هزا نفررجال غريب.
أم فهد: وش تقولين أنتي.
نجود:ههههههههاي يمه هي تقصد ان ابوي جاء مع واحد غريب.
أم فهد:أقول ريماس قومي وأناأمك وروحي طلي بالشباك شوفي من ذا اللي جاي صوت رجال غريب برى.
ريماس قامت وطلت مع الشباك وأضحكت.
أم فهد:وش بلاك تضحكين من اللي جاي.
ريماس:اللي جاي أبوي وعمي أبونايف ومعهم واحد مدري منهوا تعالي عهود يمكن تعرفينه.
عهودطلت مع الشباك وقالت:إيه هذا أخوي خالد بس وش فيه ضايق.
نجود:مسيكين شكل أبوك كارفه من الصبح.
عهود:هومانام من امس.
ريماس:الله يعينه.
عهود:بروح أسلم على عمي واجي.
أم فهد:عهود ألبسي عباتك ترى فيه عمال برى.
عهود:إنشالله.
طلعت عهود تسلم على عمها,أماخالد وأبوها راحو للبيت يريحون ويوم سلمت على عمها دخلت جوا لاكن حست بالعطش وراحت للمطبخ فجاه صار لها موقف ماتنحسد عليه بس قبل لااقوله خلونا نروح مع بعض نشوف إيش صار مع بندرفي السياره.
(في سياره بندر):
بندرقرفان من نفسه ومتضايق بالحيل دق عليه أبوه رد وهوماسك أعصابه وقال: سم .
أبوه: هاه وش صار على الذبايح.
بندر:والله أحتمال أتأخرشوي بالغداء أناجاي بعد شوي معي صحنين مفاطيح بحطها بالمطبخ وبروح أجيب البقيه.
ابوه: زين وأناأبوك لاتفشلني مع الجماعه تراهم أوصلوا يالله فمان الله بروح أستقبلهم عجل لاتتأخرعلينا.
بندر:إنشالله.
(في سياره خالد):
خالد:يبه ليه ماجلست في بيت عمي الجماعه بيوصلون بعد شوي.
أبوه:والله كان ودي بس مب زينه أستقبلهم وأناتوني جاي من الشركه لازم أتروش وألبس البشت الأسود حق العزايم وأتبخر بالعود وأتطيب ثم أستقبلهم.
خالد:ومن اللي بيوديك لبيت عمي إذا تشخصت .
أبوه: أخوك نايف,كلمني من شوي وقال انه جاهز ولابس ويحتريني في بيتنالأنه بيستقبل الرجال معنا.
خالد:أجل بنام لأني دايخ.
أبوه:أنت عاد جب خواتك وأمك لبيت عمك وأبيكم تجون بدري يمديك تنام نص ساعه وبعدها ابيك تجلس مع الرجال.
خالد:يصيرخير.
(في سياره بدر):
نوره: بدرعهود جت عندنا.
بدر: مدري بس مشعل جابهامن شوي.
نوره: يس اخيرآ بشوفها.
بدور:خالي بدر وقف البقاله نبي حلاو.
خالد:إيه خالي تكفى وقف البقاله.
بدر:اوكيه بوقف بس لكم خمس دقايق بس تشترون فيها.
خالد:يعيش خالي.
نوره: خلودي جب لي معك فشفاش ولاتنسى أخوك بندر جب له حلاوا.
خالد:طيب خلاص اسكتي فشلتينا.
بدر:الله يعيني على مابلاني.
نوره: تقصد؟.
بدر:لاولاشي يالله ياخالد عجل علينا.
(في بيت أبوفهد):
(في قسم الرجال):
كان أبوفهد في قمه الشياكه والشخصيه وهويستقبل المعازيم هووولده فهد وأخوه أبونايف وولده نايف فجأه دخل بندر ويوم لمح السيارات عند الباب قرر يدخل الذبايح في قسم الحريم عشان يروح للمطبخ فاللي صارهناك شي ماهومتوقع أخليكم مع الأحداث:
عهودكانت بالمطبخ تشرب مويه وتغني وهي لابسه عباتهالأن فيه رجال , فجأه طلع لها صرصور وطلعت من المطبخ مسرعه تركض ماتشوف اللي قدامها.
أمابندرالمسكين نزل من سيارته صحن فيه مفطح وكان ثقيل بالمره وتوه متجه للمطبخ فجأه طلعت بوجهه عهود وهي تركض وصدمت فيه وطاح الصحن على الأرض وأنكب الرز كله وتناثر في الأرض, بندرظن أنها أخته نوره فقال لها:عميانه أنتي ماتشوفين.
عهود أرتبكت وخافت وقامت مسرعه ودخلت للصاله وهي تبكي, امابندرقام يجمع الرز من على الأرض وهويردد إنالله وإناإليه راجعون, قام ونادى الشغاله وقال لها:شيلي الرز واكنسي الأرض وغسليها وحطي الرز بكيس .
فجأه دخلت نوره وعيال نجود ويوم شافوا بندر أضحكوا على شكله.
نوره: يالله وش صاير هنا وش فيك بندر كنك متروش برز.
بندربضيقه:البركه فيك.
نوره:ليه اناوش سويت؟.
بندر:صدمتي فيني ودخلتي مسرعه للصاله وطالعه بكل برود تسأليني وش فيك.
نوره بتعجب:أناصادمه فيك متى أصلآ توني جايه من المدرسه.
بدر: الله يعينك لويدري الشايب أن الرز أنكب ترى بيجي وزيرمع التجار.
بندر: ياحبيبي أكملت شكلي بروح لسوق الغنم مره ثانيه الظاهرأني مومرتاح اليوم.
نوره:الله يعينك بس أنت وش بتسوي بالرزواللحم اللي طاحوا بالأرض.
بندر:بعطيه جمعيه خيريه ولاأي أحد من العمال اللي يشتغلون بالشوارع.
نوره:طيب من البنت اللي صدمت فيك.
بندر:لا ولاشي زلق مني الصحن واناأمشي أنتي ادخلي جوا أحسن لك بس لاتقولين لأحد أن الرز أنكب بروح أجيب ذبيحه غيرها.
نوره:أوكيه باي والله يعينك ههههههههاي.
يوم دخلت نوره قال بدر لبندر:أقول من البنت اللي صقعت فيك.
بندروهويشيل الصحن وينفض ثوبه قال: مدري ولاأبي أدري الله ياخذ عدوها ماطلعت بوجهي إلا ذا الوقت.
بدر:شكلها عهود بنت عمي.
بندر:بقلعتها, المهم بروح أنزل الصحن الثاني وبحطه بالمطبخ ثم بروح لسوق الغنم وأنت رح أستقبل المعازيم مع أبوي ترى الجماعه والشباب أوصلوا.
بدر:بتروش بالأول وبصحي محمدوبننزل يالله روح لحق لايسكرالسوق.
بدردخل جوا البيت وبندرشاف دفترتحضيرمنطول بالحوش ومن اللقافه أخذه معه وحطه بالسياره وأنطلق لسوق الغنم وهوضايق ويردد لاحول ولاقوه إلابالله.
(في صاله الحريم)
(عندالمغاسل):
نوره شافت عهود تبكي عندالمغسله وهي تنتفض قالت لها:بسم الله عليك وش فيك تنتفضين.
عهود:لابس بردانه شوي.
نوره:طيب ليه تبكين وش فيك.
عهود:ولاشي.
نوره : طيب ليه عباتك مليانه بقع زيت وفيها رز متناثر, لايكون أنتي اللي صدمتي في بندرأخوي بالحوش.
عهود:والله ماقصدت , أنارحت للمطبخ أشرب مويه لأني سلمت على عمي وكان معي دفتر التحضير حقي وفجأه طلع لي صرصور وخفت منه وطلعت مسرعه من المطبخ فجأه صدمت في أخوك والله ماكنت أدري أنه بيجي في طريقي.
نور:هههههههههاي حلوه هذي أقول أفصخي عباتك بعطيهاالخدامه تغسلها وبعدين بندرمايدري من اللي صدم فيه ولاتخافين راح يجيب ذبيحه غيرها وطنشي ترى الموضوع مايستاهل والرزشالته الخدامه وحطته بكيس ووداه بندر للجمعيه الخيريه .
عهود: طيب الحوش صار وصخ.
نوره: ياحليلك ميري غسلت الحوش بالصابون وصارالحوش يلق من النظافه, ياأختي أمشي خلينا نرقى فوق لغرفتي من زمان ماسولفت معك أنتي أسبقيني لغرفتي وانا بعطي ميري عباتك عشان تغسلها ولاتخافين مافيه أحد فوق.
(في سياره بندر)
بندر جالس يحاكي نفسه ويقول:إنالله وإنا إليه راجعون , الحين وش بتسوي بهذي المصيبه لاحول الله بس أموت وأعرف منهي اللي صدمت فيك . طيب هذا الدفتر كان معها أكيد أنه دفترها خلني أفتحه وأشوف وش أسمها , ماشالله تدرس قسم أدب ومزينه الدفتر ومعطرته وكاتبه فيه المحاضرات بس ماعليه أسم.
بندر وهويتصفح الدفتر لقى صوره بنت وأنصدم بصدمه غير طبيعيه لأن الصوره كانت صوره بنت في قمه الجمال لاكنه مايدري من صاحبه الصوره ويوم شافها تلعثم في مكانه حب يشوف وش الأسم اللي مكتوب على الدفتر وللأسف عهود ماكتبت أسمها على دفترها.
بندر قال بينه وبين نفسه: منهي هذي البنت, والله أنها جرح ماشالله جميله كنها سوريه بس من تكون ؟. إيه صح هذي اللي لمحت وجهها الصبح عندباب بيت عمي أبونايف بس من تكون ياويل قلبي ماشالله وش هذا الجمال, أقول تعوذ من بليس وسكر الدفتر مايجوز تشوف صوره بنت الناس منت محرم لها أستح على وجهك مايجوز.
فجأه قطع تفكير بندر صوت رنين الجوال وكان المتصل أبوه.
بندر:سم يبه بغيت شي.
أبوه: وينك تأخرت علينا.
بندر:عندالطباخ ويقول أن الحاشي يبيله ساعه جبت صحن للبيت وبقى أربعه صحون شوي وأجيبها لكم.
أبوه: أنهج علينا لاتفشلنا قدام الجماعه يالله فمان الله.
بندرتنهد وقال: فمان الكريم.
(في بيت أبوفهد)
عهود تمشي بهدوء في الدرج وراحت لغرفه نوره وماكان فيها أحد فتحت باب الغرفه وجلست على السريرثمآ انسدحت لأنها مرهقه وبدون شعةر نامت
بدرغرفته قريبه من غرفه نوره وطلع من غرفته يبي ياخذ الإستشوار من عند نوره لأن الجو بارد ويبي ينشف شعره بالإستشوار وشاف باب الغرفه مفتوح ظن أن مافيها أحد و دخل بدون مايطالع طريقه وتوجه للتسريحه وفتح الدرج الأول وطلع الإستشوار ولمح وحده نايمه على السريرومعطيته ظهرها ظن أنها نوره وطلع من الغرفه بدون مايشوفها,
دخلت نوره غرفتها وشافت عهود نايمه لاكنها صحتها قالت لها: عهود ألحين ليه نمتي وخليتيني.
عهود:ياأختي شفتك تأخرتي علي قلت أخذغفوه ليماتجين.
فجأه دخل بدروعهود غطت وجهها بالكمبل وبدرقال:نوره أستشوارك ذا رفع ضغطي.
نوره صرخت وقالت:أطلع برى فيه بنت عمي.
بدرطاح وجهه وراح لغرفته وقال:نوره تعالي.
عهود:ياربيه وش ذى الحظ الشين من شوي بالحوش والحين بالغرفه أجل الله يستر من الجاي.
نوره:ههههههههاي ياأختي فليها وربك بيحلها.
(في غرفه بدر):
نوره:هاه وش تبي يالمزعج.
بدر:من اللي عندك بالغرفه.
نوره:ياشين اللقافه ياأخي خلصني وش تبي.
بدر:استشوارك رفع ضغطي أبيك تنشفين شعري الجماعه تحت لازم أنزل.
نوره:هههههههاي وبندرمابعد جاء الله يعينه.
بدر:ياأختي أخلصي علي خليني اروح .
نوره: طيب محمدوينه.
بدر:صحى من زمان وتروش وهوالحين جالس مع الرجال بالمجلس.
نوره:ماشالله عليه, خلاص شعرك نشف ومافيه ولانقطه مويه وبحط لك فيه كريم عشان يهجد.
بدر:مايحتاج بس أنتي جيبي شماغي وعقالي .
نوره:شماغك وعقالك تحت بالصاله وبتلقى بخور تبخر وتطيب عشان ماتفشل أبوي.
بدر:أقول وخري عن طريقي خليني أنزل لايجي فهد ويعطيني محاضره في أداب الضيافه يالله باي.
نوره:هههههههاي باي يالمرجوج لاتنسى تلبس جزمتك ههههههههاي.
(في مجلس الرجال):
(جهه الشيبان):
أبوفهد:ياهلا والله الله يحييكم أسفرت وأنورت.
أبوخالد:ماعليك زود.
أبوفهد:ياعيال صبوا قهوه لضيوفنا, هذي الساعه المباركه.
أبوتركي:أجل ماقلت لي ياأبوفهد وين عيالك مالهم حس.
أبوفهد:شفهم قبالك هذاك محمدوذاك فهد وذاك بدرأوبندر واحد منهم.
أبوتركي:ماشالله مسرع أكبروا خبري بهم كانوا صغار يلعبون ههههههه.
أبونايف:أذكرالله يارجال.
أبوتركي: ماشاء لله تبارك الرحمان.
(جهه الشباب):
مشعل: أقول شباب موكن العزيمه ممله.
محمد:إيه والله صدقت كلهم شيبان.
بدر:متى يجي بندر عشان نحط الغداء ويتغدون ويروحون ونفتك ياأخي نبي نروح للبر الجو يهبل يصلح للتخييم.
محمد: أوف شباب شوفو من اللي دخل للمجلس.
مشاري:لاحول ولاقوه إلى بالله وش ذى النشبه وش جابه.
مشعل:من تقصدون؟.
بدر:ماجد ولد عمه أبوي ياشين ذى الأدمي ماأطيقه ياشباب صرفوه.
فهد:أقول أستح على وجهك هذا ولد عمه أبوي ياعيال سلموا عليه.
ماجد:سلام شباب كيفكم تمام.
فهد:الحمدالله أنت كيفك تمام.
ماجد:يارجال من جيت من فرنسا وأناضايق صدري.
فهد:عسى ماشر؟.
ماجد:لابس مليت من الرياض وودي أرجع لفرنسا.
محمدبهمس يقول للشباب:شفتوا قايل لكم أنه غثيث الحين بيقعد يبجخ بسفراته وفلوسه.
ماجد:بصراحه الجو عندكم ممل جدآ.
وافي:إيه ماشالله عليك.
فجأه رن جوال ماجد وقال:عن اذنكم شباب جتني مكالمه ضروريه أعتذر منكم أناجيت بس عشان أسلم عليكم لأن سفرتي بعد نص ساعه يالله أشوفكم على خيروإنشالله نتقابل في عزيمه ثانيه يالله باي شباب.
فيصل:راح الغثيث الحمدالله رب العالمين.
خالد: ياشباب وهويتكلم حسيت أن ودي أخنقه تدرون ليش لأنه ماينبلع.
متعب:خالد خلاص يكفي عيب اللي تقوله.
محمد:انشب الحين بنسمع محاظرات عن الأخلاق .
فهد:أصلآ حنى نضيع وقتنا مع شباب طايش يالله يامتعب وياوافي قوموا ورحبوا بالرجال.
خالد:مدرسه هي كل شوي نهلي ونرحب.
محمد:خلك مع الخيل ياشقراء أن قاموا يرحبون قم معهم وان جلسوا اجلس معهم وخلي أبتسامتك عريضه ترى الشيبان يراقبوننا من بعيد.
مشعل: أقول ورى مانقوم ونجلس في جهه الشيبان ترى سوالفهم تموت من الضحك.
محمد:قوموا عل وعسى يطيرالوقت ويروحون.
(في قسم الحريم):
(في الصاله):
كل الحريم مجتمعين يتقهوون ويسولفون والأصوات والضحكات عاليه , البنات جالسين بجهه والحريم جالسين بجهه
قالت ام نايف:والله أنك ياعهود روعتيني, أجل تطلعين من الجامعه وتروحين بيت عمك بدون ماتعطيني خبر.
عهود:وش أسوي نوره ألحت علي أجيهم بدري.
أم فهد:ماعليك منها البنت جايه في بيت عمها موواحد غريب.
أم نايف:هاه ياأم وافي عساك جبتي المحلى اللي وصيتك عليه.
أم وافي: إيه جبته ياخالتي وسنعته مثل ماتحبين.
أم نايف: زين سويتي.
أم فهد:نوره وانا أمك أتصلي على بندر وش فيه تاخر علينا بالغداء ترانا جعنا.
نوره: والله اتصلت عليه من شوي يقول بالطريق جاي ومعه كل الذبايح .
أم نايف:المسكين الين الحين يفتربالسياره عشان الغداء.
أم فهد:وش أسوي بابوه هواللي ألح عليه يجيبها.
أم نايف:الله يعينه .
فجأه رن جوال عهود وكان المتصل أخوها خالد قال لها:أطلعي برى معي شي لك.
عهود قامت وقالت لأمها:يمه بروح أشوف خالد وش يبي.
أم نايف:اجل وأناأمك روحي المطبخ وأغرفي شوي من المحلى في صحن وجيبيه خلينا نذوقه.
أم فهد:إيه تكفين متنا جوع وحنانحتري الغداء الله يهديك يابندر.
عهود:إنشالله.
جاء بندر بالذبايح وحطها بالمطبخ وجلس على الطاوله عشان يريح شوي لأنه منهد حيله بالمره يوم جاء بيطلع سمع صوت عهود وحسبها أخته نجود حب يسوي فيها مقلب توزى تحت طاوله المطبخ أخليكم مع الأحداث:
طلعت عهود برى وقابلت خالد عند المطبخ
خالد:هلا عهوده وينك مختفيه.
عهود: لامختفيه ولاشي وش بغيت ياأخوي.
خالد:لابس معي غرض لك.
عهود: وش معك.
خالد: معي كيس مليان حلويات ومن النوع اللي تحبينه أنا مكثرمنه عشان توزعين على الكل.
عهود:وش ذى الكرم اللي طرى عليك فجأه.
خالد:لابس مريت البقاله وتذكرتك وجبت لك هذي الورده بعد.
عهود:قامت تطامرمن الفرحه ومن الفرحه ضمت أخوها خالد وعطته بوسه على خده وقالت له: مشكور ياأروع خلودي بهالعالم.
وراحت للمطبخ وهي مبسوطه.
خالد قال بينه وبين نفسه:يالبى قليبها بصراحه أختي ذي فتنه أعوذ بالله أفتنتني وهي ماتدري بصراحه لوأنها مب أختي كان تزوجتها ياحظ من بيتزوجها أه ياقلبي ليجيت أتزوج بتزوج وحده نسخه منها ولا بتم طول عمري عزابي, أقول أستح على وجهك هذي أختك لاتخلي بليس يلعب براسك .
عهود مشت للمطبخ وهي تغني أغنيه:( ياورد من علمك تجرح الجرح ماهومن أطباعك)
أمابندر يوم جاء يطلع من المطبخ سمع صوتها وهي تغني وظن أنها نجود فحب يسوي فيها مقلب ويروعها فقام توزا تحت الطاوله منتظر قدومها عشان يروعها وفعلآ دخلت لاكن اللي دخلت وحده غريبه لاهي نجود ولاهي وحده من خواته كان صوتها بالنسبه لبندر جنان كانت تغني وماسكه ورده حمراء بيدها, شالت الحافظه اللي فيها محلا وحطتها على الطاوله وغرفت منه بدلع في هذي اللحظه وللمره الأولى خفق قلب بندربسرعه مايدري هوبحلم ولابعلم فجأه طاحت الورده من يد عهود جت بتأخذها فجأه دخلت ميري للمطبخ.
عهود:هاي ميري هواريو.
ميري:أيام فاين ثانكيوا.
ميري شافت بندرتحت الطاوله وتوها بتتكلم أشرلها بندرتطلع وتسكرباب المطبخ , وطلعت وسكرت الباب.
بعد ماغرفت عهود المحلا كان بندر يطالعها من فوق لتحت نسى نفسه يوم شافها مايدري هذي ملاك ولاقمر هذا جمال ولاحلا , المسكين ضاع منه عقله وتفكيره سوا , المسكين تلعثم وعاش في حلم حلو في وقت قصيرفجأه فضحه جواله ورن والمتصل كان أخوه محمد وبندرالمسكين أرتاع ونسى نفسه ورد عليه وقال:أنا جيت والغداء جاهز بالمطبخ بتروش واجيكم سلام.
عهود خافت وطاح منها صحن المحلا لأنها ماتوقعت أن بيكون فيه أحد غيرها بالمطبخ والمسكينه من الخوف تبنجت في مكانها وقامت تنتفض بسرعه وأسرعت لباب المطبخ تبي تفتحه ومن خوفها ماعرفت تفتحه , طلع بندر من تحت الطاوله وهويطالع الأرض قال: أناأسف حسبتك نجود أختي مادريت أنك وحده ثانيه أناأسف.
بندروهويقول هالكلام كان قلبه يخفق ماعمره شاف وحده مثلها كامله والكامل الله جمال أخلاق دلع كل شي فيها حلو.
بندركان واقف في طريق عهود وعهود تبي تمشي ماقدرت الحيا منعها خفق قلبها بقوه تجرأت وقالت له: ممكن توخر عن طريقي.
بندرطالعها بنظره عشق وقالها:اسف.
وطلعت عهود وهي مسرعه ودخلت جوا, أمابندرجلس على كرسي واخذ الورده من على الأرض وهو متعجب من نفسه لأن قلبه مازال يخفق بسرعه.