"]عظمة شهر رمضان الكريم
*شهر رمضان .. هو الشهر الوحيد اللي ذكر في القران الكريم بشكل صريح وذلك في قوله تعالى في سورة البقرة
شهر رمضان الذي انزل فيه القران هدىً للناس وبينات من الهدى والفرقان (الايه 184)
والايه فيها دليل بردو على أن ليلة القدر نزل فيه القران من اللوح المحفوظ مرة واحده .. فوضع في بيت العزة في السماء الدنيا .. ثم نزل على جبريل عليه السلام على نبينا محمد صلى الله عليه وسلم في ليلة القدر على 23 او 24 سنه (الكلام من تفسير القرطبي)
اقرأوا قول رسول الله "صلى الله عليه وسلم
(شهر رمضان شهر خير وبركة يغشاكم الله فيه برحمته ويباهي بكم ملائكته وينظر فيه إلى تنافسكم فأروه من أنفسكم خيرا)
شفتو الوصية الجميلة والبسيطة والمهمة جدا جدا من رسول الله "صلى الله عليه وسلم" لينا بشهر رمضان ؟؟
ربنا بيفخر بينا امام الملائكة .. الملائكة اللي خلقت من اجل عبادة الله فقط ولم يعصوه قط .. وهم دائما في حالة عباده وخشوع لله !!! تصوروا ربنا بيتباهى بينا امام المخلوقات النورانية الطاهرة دي ؟؟
رسولنا الكريم صلى الله عليه وسلم وصانا " فأروه من أنفسكم خيراً " ... مش فأروه من أنفسكم مشاهدتكم للمسلسلات والفوازير ... مش فاروه من أنفسكم التنافس في ما لذ وطاب من الاطعمه !!
وحديث رسول الله "صلى الله عليه وسلم"
(بني الإسلام على خمس : شهادة أن لا إله ألا الله، وأن محمد رسول الله، وإقام الصلاة، وإيتاء الزكاة، وصوم رمضان، وحج البيت لمن استطاع إلي سبيلا)
متفق عليه
يااااااااه !! يعني الدين الاسلامي .. دين الحق .. والدين اللي به سوف يدخل صاحبه جنه الخلد والنعيم الابدي باذن الله ... من ضمن أعمدته الاساسية اللي من غيرها لا يعتبر الانسان مسلم ... صيام شهر رمضان !!
وهل صيام هذا الشهر عن الاكل والشرب والجماع وبس على كدا ؟؟
وهل الغرض فقط هو الاحساس بالجوع والعطش وضبط النفس عن الاستمتاع بحليلته ؟؟
لا طبعا !! الغرض اكبر من كدا بكتييير ... الغرض هو السمو بالنفس من أجل اعلاء الايمان في القلب والقرب من الله ... ومنها الى الجنه باذن الله
الانسان المؤمن .. تجد دائما نفسه ساميه ... شخصيته شامخه .. وكيف لا ؟؟ وهو مرتبط بالله سبحانه وتعالى ؟؟
وبالنسبة لشهر رمضان ..هل الارتباط دا حيجي من خلال المسلسل الفلاني والفازورة العلانية وبرنامج ما قبل السحور والفطور ؟؟
عزة المسلم وشرفه .. في الارتباط بدينه وربه فقط .. ومن ابتغى العزة في غير دين الاسلام اذله الله سبحانه وتعالى ... والعزة ان احنا نخلص العمل في شهر رمضان الكريم ... العمل الجاد والمخلص
وحديث رسول الله ايضا "صلى الله عليه وسلم"
(اذا كان اول ليلة من شهر رمضان صفدت الشياطين ومردة الجن وغلقت ابواب النار فلم يفتح منها باب وفتحت اوباب الجنه فلم يغلق منها باب، وينادي مناد يا بغي الخير اقبل ويا باغي الشر اقصر، ولله عتقاء من النار وذلك كل ليلة)
اخرجه الترمذي
الله عليك مميزات !!
شهر رمضان بس اللي فيها الميزة العظيمة دي !!
لما انت يا مسلم تشوف واحده حلوة في الشارع ... تقوم تبص عليها علشان تمتع نظرك
وانتي يا مسلمه .. لو شفتي واحد شعره مسبسب كدا ومتشيك وعايش دور الواد الروش .. عينك بتيجي عليه وبتتغزلي من جواكي في وسمته !!
يا ترى ليه الانسان ممكن يعمل معصية ؟؟؟ هل لانه انسان وحش ؟؟
لا .. ولكن لان الله سلط على بني ادم حاجتين هما اللي بيدفعوه للمعصية :
النفس .. والشيطان
اقراوا قول الله تعالى في سورة يوسف
وما أبرئ نفسي إن النفس لأمارة بالسوء إلا من رحم ربي إن ربي غفور رحيم
وقال في سورة ابراهيم
وقال الشيطان لما قضى الامر ...
دول دليلين ان النفس والشيطان هما اللي بيخلو الانسان يقع في المعصية
ولكن ربنا حيرحمك يا مسلم ويا مسلمة من سبب من السببين اللي بيخليكو تعصوا الله وتعيشوا في حسرة وحزن دائم بسبب المعاصي دي وهموم دنيوية ملهاش اخر !!
ربنا حيريحك من الشيطان بانه يحبسه في نار جهنم .. ومن مردة الجان كمان اللي هما العن من الشيطان نفسه !!
يعني اللي عليك انك تراوض نفسك وتتحكم فيها ... دا امر مش صعب لمن يردي الوصول لله عز وجل ... نفسك مثل الاسد ان لو مروضتوش .. حياكلك !!!
الاستعانه بالله عز وجل والتحكم في النفس مهما كان المغريات .. سوف ينجيك من نفسك الامارة بالسوء باذن الله
انت عارف ان التمثيلية الفلانية جميلة اوي اوي لان فيها محمود عبد العزيز واشرف عبد الباقي وعلاء ولي الدين .. ايووووو!! دا الضحك للركب يا جدعاااان في التمثيلية دي !!
ولا البرنامج دا .. بتقدمه منى مش فاكر اسمها منى ايه ودا بيقدمه معتز بردو مش فاكر اسمه معتز الليه و بتاع الريس ...
شوفت النفس حتقولك ايه من جوا .. تقوم تقعد وتتفرج وتستمع وتضحك وثواني رمضان الغاليه جدا بتعدي وتمر !!!
تستمتع واوقات رمضان اللي فيها بركه مش موجوده في اي شهر اخر واللي بيتحبس فيها الشيطاين تمر وانت قاعد بتفرح الشيطان بيك وهو مصفد في النار !! لانه مش عايز لك الخيرو لا عايزك تعبد ربنا ولا تكتسب حسنات وبركات شهر رمضان !!!
انتزه فرصة ان الشيطان محبوس ... مش حيبقى ليك غير نفسك اللي تتحكم فيها وفي اوامرها لك بالكسل والخمول .. نفسك حتأمرك تقولك " يا عمي صلاة التراويح سنه .. يعني ملوش لزوم تصلي ... انزل للعشاء وحلو على كدا"
يا عمي روح عن نفسك شوية .. اتفرج على البرنامج دا والتمثيلية دي وحل الفزورة دي علشان تكسب 500 جنيه !!
نفسك عمرها ما حتقولك .. قوم صلي التراويح مع المسلمين ... وركز في شهر رمضان .. انت اللي لازم تجبر نفسك من جوا على كدا ... وحتتجبر باذن الله لو انت عايز تجبرها .. والامر فيه تعب وفيه صبر ... ولكن النتيجة انك حتنجي نفسك من نار جهنم .. وحتفوز الفوز العظيم في شهر رمضان الكريم
وحديث رسول الله "صلى الله عليه وسلم
(كل عمل ابن ادم له إلا الصيام فإنه لي وأنا أجزي به، والصيام جنة فإذا كان يوم صوم أحدكم فلا يرفث ولا يصخب فإن سابه أحد أو قاتله فليقل إني صائم، والذي نفس محمد بيده لخلوف فم الصائم أطيب عند الله من ريح المسك، وللصائم فرحتان يفرحهما : إذا أفطر فرح بفطره وإذا لقى ربه فرح بصومه)
متفق عليه
سبحان الله !!
الله سبحانه وتعالى اختص الصوم بالإضافه اليه مع ان كل العبادات لله سبحانه وتعالى ... ورغم ذلك ذكر الصيام دون غيره .. ودا معناه ان الصيام لها منزله كبيره عند الله ... ولازم يكون له منزله كبيره عندنا احنا كمان
لما مدير يكون مكلفك بعدة اشغال معينة .. ولكن يجي يقولك الشغلانه الفلانية بالذات لازم تنجزه صح .. اكيد حتهتم بكل الاشغال .. ولكن حتركز على الشغلانه اللي قالك عليها مديرك .. حتاخد للشغلانه دي معظم وقتك وجهدك وتفكيرك .. علشان ترضي مديرك .. ويجزيك الجزاء الكبير
ممكن من خلال الحديث السابق نقول ان ربنا اختص الصيام دون غيره من العبادات :
1- لان الصيام عباده مرتبطة بالنية في القلب وسر بين العبد وربه .. العبادات الاخرى الناس شايفاك وانت بتؤديها .. وممكن يدخل النفاق والعياذ بالله في العباده علشان يكون للمتعبد مظهر جميل امام الناس ... ولكن الصيام مفيهوش رياء .. لان محدش شايفك وانت بتصوم
2- اجر الصوم ملوش عدد معين ولا حساب محدد .. لان ربنا قال في الحديث ان هو اللي بيجزي به ... ولم يحدد الاجر عليه .. والله سبحانه وتعالى كريم على عباده في الاجر والجزاء
* عن سهيل بن سعد قال : سمعت رسول الله "صلى الله عليه وسلم" يقول
(إن في الجنة بابا يقال له الريان،فإذا كان يوم القيامة قيل: أين الصائمون فإذا دخلوا أغلق فيشربون منه، فمن شرب منه لم يظمأ أبدا)
حسنه الترمذي
يعني في باب مخصوص من ابواب الجنه .. للي كانوا بيصومو ايام الحياة الدنيا .. لما حيجي عند الباب دا .. حيعرف قيمة انه اطاع الله في الدنيا وصام رمضان حق الصيام الى جانب النوافل .. حينادي منادي يومها ... أين الصائمون ؟؟
فين اللي كانوا بيصوموا في الدنيا ؟؟
ولما يدخل منه كل الصائمون حيشربوا منه ... واللي حيشرب منه مش حيعطش ابدا !!
طبعا !! مش انت يا مسلم وانتي يا مسلمه كنتو بتحرموا نفسكو من كل ملذات الحياة اثناء الصيام ؟؟
وهو في اجمل من ان الواحد يشرب شربة ميه يوم القيامه ؟؟
لا دا انتو حتشربو وكمان مش حتعطشو ابدا تاني زي ما كنتو بتعطشو ايام الدنيا .. علشان انت حتبقى في الجنه مش فاضي بئا كل شوية تروح تشرب من اجل ارواء العطش ... الشرب بس حيكون للاستمتاع !!
دي بعض من مميزات شهر رمضان المبارك .. ومعرفتها تبعث في النفس المسلمة النقية تعظيم هذا الشهر الكريم وتجعلنا نستعد بكل قوتنا لاستقبال الشهر بالطاعة والقوة والنشاط والحماسة .. طمعا في بلوغ السعادة في الدنيا والكرامة في الاخرة.
يا اخواني واخواتي في الله ... ربنا يعيننا ويوفقنا الى شهر رمضان الكريم واللي خلاص باقي عليه ايام معدوده ... ولازم نكون مستعدين له نفسيا وايمانيا كويس اوي .. ومنضيعش الفرصه دي من ايدينا ...
سنه كامله عايشين في ذنوب وغفله وبعد عن طاعة الله .. بسبب الدنيا والشيطان والنفس الامارة بالسوء ... يلا بئا نغسل نفسنا شوية من دا كله .. ونخزي الشيطان اللي مش عايز لنا غير الشر وبس
اعرفوا نقطه مهمه اوي اوي ... محدش فينا عارف هو حيبلغ رمضان او لا ... ولو بلغ رمضان هل حيكملو ولا لا .. ولو ربنا كرمه واكمل رمضان .. هل حيبلغ رمضان القادم ولا لا ...
النفس ممكن يدخل الصدر وميخرجش تاني !!!
علشان كدا .. لو ادركتم رمضان .. احمدوا ربنا على النعمه الكبييييييييرة جدا جدا دي ... واشكروه بانكو تجتهدوا في تعمير وقتكم في رمضان بكل انواع الطاعات .. صيام وقيام وقراءة قران ودعاء لك ولاخوانك ولكل اللي بتحبهم من المسلمين .. ولكل المسلمين الاحياء منهم والاموات .. تصدقوا كتير في رمضان .. روح صالح جارك اللي ياما زعلتو ومتخاصم علشان اسباب تافه
"فستذكرون ما اقول لكم وافوض امري الى الله"
وفي الاخر اقول لكم .. لا تنسونا من صالح دعائكم والثبات في الدنيا والاخره .. وكما قلت لكم في اول الموضوع .. ارجو نشر هذه الرسالة في كل المنتديات ومن خلال الميلات وطباعتها على الورق وتوزيعها بحسب مقدرتكم
والسلام عليكم ورحمة الله وبركاته
وسوف نقوم بعرض للطاعات وكيفية القيام بها فى شهر رمضان فى توبك اخر ان شاء الله
--------------------
قُلْ يَا أَيُّهَا النَّاسُ إِن كُنتُمْ فِي شَكٍّ مِّن دِينِي فَلاَ أَعْبُدُ الَّذِينَ تَعْبُدُونَ مِن دُونِ اللّهِ وَلَكِنْ أَعْبُدُ اللّهَ الَّذِي يَتَوَفَّاكُمْ وَأُمِرْتُ أَنْ أَكُونَ مِنَ الْمُؤْمِنِينَ (104) وَأَنْ أَقِمْ وَجْهَكَ لِلدِّينِ حَنِيفًا وَلاَ تَكُونَنَّ مِنَ الْمُشْرِكِينَ (105)وَلاَ تَدْعُ مِن دُونِ اللّهِ مَا لاَ يَنفَعُكَ وَلاَ يَضُرُّكَ فَإِن فَعَلْتَ فَإِنَّكَ إِذًا مِّنَ الظَّالِمِينَ (106) وَإِن يَمْسَسْكَ اللّهُ بِضُرٍّ فَلاَ كَاشِفَ لَهُ إِلاَّ هُوَ وَإِن يُرِدْكَ بِخَيْرٍ فَلاَ رَآدَّ لِفَضْلِهِ يُصَيبُ بِهِ مَن يَشَاء مِنْ عِبَادِهِ وَهُوَ الْغَفُورُ الرَّحِيمُ (107) [/SIZE]
11-09-2007, 08:36 PM
عظمة شهر رمضان الكريم
إضافة رد: عظمة شهر رمضان الكريم
منتديات بنات
انا بحاجه لردك
