غرفتي كولد ...
قبل ما تدش الغرفة بمترين تلاقي نعال - أكرمكم الله - تقرب اشوي تلاقي دلاغ طوله ربع متر حق كرة القدم ... و أول ما تدش ... أكبد بتطلع مرة ثانية ... بس ما تنلام ... ملزق بوستر حق فييرا و هو يركظ - الخدامة تخاف منه حسبالها غوريلا منحاشة من القفص أو من هذا القبيل و انا حاطه متعمد عشان ما ابيها تدش ولا كنت اقدر احط بيكهام أرحم ...
المهم ... و الويه الثاني من الباب ملزق عليه صورة سيارتي و هي واقفة يم شومايكل <<< طبعا هالصورة مزورة ... بس اشحلاتها سيارتي وهي يمه شكلها جنها مستحية ... و بعد لازق صورتها لما سويت فيها الحادث <<< المسكينة كسرت خاطي ... بس كله من هالتكسي لف علي و انا ماشي عالـ100 كيلو ... و الصورة الثالثة رعب ... صورة البنت إللي في فلم the ring ... هالصورة ما تحب تشوفها الوالددة عشان جذي حطيتها في الويه الداخلي للباب ... إي و نسيت أقول ... انا حاط حديدة عالباب عشان اتعلق <<< حق التمارين الرياظية طبعا لا تحسبوني مينون
ترى هذا بس الباب ... بحاول اختصر عليكم قدر الامكان ....
الحين المنظر العام للغرفة ... إذا بتمشي فيها لازم تحذر ... اهني كرة واهناك بلوزة و يمها حديد بو 8 كيلو ... و بالزاوية كرتون رد بول ... و هذا غير السيديات إللي مطشرة كل مكان ... و تعال شوف الكرفاية ... كرفاية أم نفرين بس النفر الثاني إللي ينام فيها عبارة عن مجموعة من الأشياء العشوائية ... كامرة يم المخدة و كتابين عند الكنبل و ثلاث ولا أربع قطع ملابس و شوية مجلات عن السيارات و و و ... و لما تفتح الكبت - إللي هو الخزانة - باختصار جنك فاتح باب مخزن .... جني طولت عليكم ... يلا ميخالف قاعد اختصر ...
طبعا الزولية شلتها ... عشان انام عالسيراميك اذا حسيت بالحر ... - المشكلة بالخدامة إللي كل ما تدش غرفتي ترد الزولية - الله يهداهة بس ... و مثل ما قلت لكم في البداية ... ما احب اشوف الخدامة داخل غرفتي
... كل ما تدش تعفسلي الأغراظ ... أو بمعنى أصح ترتبهم ... لكن المشكلة إذا رتبتهم انا أضيع ... لأني متعود على ان الفوطة على الكرسي و علبة الكلنكس تحت الكمبل و الكتب على الكرفاية و و و ... لكن الخدامة تغير أماكنهم كلهم ... أدور و أدور عليهم ... آخر شي - إذا دشت الشفت - ألاقي الكلنكس عالطاولة أو على التسريحة و الكتب يا إما في الادراج أو على المكتب .. وو .. عشان جذي ما ابيها تدش ...
بس جدول مواعيدي هو الوحيد إللي مكانه ثابت بالدرج الأول من التسريحة ... الله و المواعيد ... تعال شوف مواعيد هالجم يوم ... بنقل لكم جم موعد بالحرف الواحد كما كتب :
1- الأحد حمني عنده ديوانية من الساعة 7
2- قبلها بو علوة يبيني بسالفة
3- الشلة الفاشلة - انا مسمي 3 من الربع هالاسم - يبوني بطلعة الاثنين
4- صاحب اللومينا يبي يقوم معاي عالخليج الساعة 11 من نفس اليوم
5- الفريق اللي درزناهم 12 - 5 يبون يعيدون المباراة يوم الثلاثة ...
هذا جدولي ... بعد ما خلصت الجامعة من فترة ...
يلا آخر شي و بختصر بعد ...
تعال شوف تلفوني ... شوف شنو مسمي الشخصيات المحيطة ...
الوالد : حي على الصلاة
الوالدة : حظرة الملكة
اختي : راديو سوى
اخوي : عبقرينو <<< ما شاء الله عليه صج موسوعة ... عين الحسود فيها عود
مدرس الفيزيا سابقا - و هذا شايب ليلحين يدرس - : المومياء
واحد من الربع : مارليبورو <<<< على فكرة هذي ماركة زقاير
سوري عالاطالة ... شسوي بعد وايد اختصرت ...
تعلـــــــــــــــــــــــــــــقات يا ناس !!!
سلام
03-02-2008, 06:25 AM
الفرق بين غرفة الولد و غرفكم يا بنات
إضافة رد: الفرق بين غرفة الولد و غرفكم يا بنات
منتديات بنات
انا بحاجه لردك
هذي حياة العزوبي ... لازم يعرفون الواقع - احنا الحين نعيش بالواقع مو المفروض - ... 
