عرض مشاركة واحدة
قديم 18-08-2005, 10:21 PM   رقم المشاركة : 17
معلومات العضو
همس الجروح
عضو نشيط
 
إحصائيات العضو








همس الجروح غير متواجد حالياً

 
إحصائية الترشيح

عدد النقاط : 10
همس الجروح is on a distinguished road

 

 

افتراضي رد : +[[[[نــــــــــــــ في جوف انســان.. ـــــــــــيران]]]]+>>تفضلوو قصه100%

دلال : تقولين له انا انخطبت



نوره : تبيني اكذب عليه ؟؟



دلال : كذبه فيها مصلحتك



نوره : طيب وش الفايده



دلال : عشان تخلينه يغار ويتحمس ويسوي المستحيل عشان يقنع اهله اذا هو صادق انهم رافضين


نوره : انتي مو تقولين يلعب ؟؟



دلال : حتى لو يكون يلعب بيخاف انك تختفين من حياته فجأه.. بيتقدم لك عشان تبقين معه مو عشان تتزوجينه



نوره : دلال انتي مجنونه تبينه يتزوجني وهو مو مقتنع فيني




دلال : اذا خطبك بيصير شيء مفروض عليه بيقتنع غصب



نوره : دلال انتي صاحيه ؟؟ اذا مو حبه اللي خلاه يخطبني عن قناعه مابيه



دلال : الحب بروحه مابيخليه يخطبك صدقيني يانوره دامه يكلمك كل يوم ومستانس معك مايهمه بس اذا خاف انك تبعدين عنه بيسوي المستحيل عشان ماتبعدين



نوره : انا مابضغط عليه واندم حتى مابيه يخطبني الا برضى اهله كلهم



دلال : بس لاتقولين له بالبدايه كذا نبي نشوف جدّيته



نوره : نشوف دلال ماتلاحظين انك مشاركتني بكل شيء



دلال : عشاني اشوف اللي ماتشوفينه قلت لك قبل هالكلام



نوره : بس هذي حياتي



دلال : مو انتي دايم تقولين ياحياتي يادلال خلاص انا حياتك وهذي حياتك يعني انا وحياتك واحد



نوره تستفز دلال : لا الحين نواف حياتي



تضحكان جميعا ويستمر النقاش بينهما بهدوء



في اليوم التالي تجتمع عائلة نواف في منزل والدتهم جميع الأخوه والأخوات مجتمعون للتشاور في قضية نواف

ترتيبهم من الأكبر


**الأخ الأكبر سعود: متزوج له ثلاثة أبناء ولدين وبنت أسمر نوعا ما متوسط الطول عريض الجسم حليم ولكنه قوي الشخصيه ويعتبر هو رجل العائله الأول بعد وفاة والده


**ليلى.. وهي ام لثلاثة أبناء جميعهم أولاد طيبه وحنونه ورأيها لايؤثر أي تأثير بالعائله.. الى انها محبوبه من الجميع لطيبة قلبها ويعتبرونها امهم الثانيه


**مها .. متزوجه منذ خمس سنوات لم تنجب حتى الآن شخصيتها قويه وهي تعتبر المرأه الحديديه بالعائله طويلة القامه جسمها متوسط بيضاء البشره متوسطة الجمال شعرها اسود وطويل حاصله على الماجستير باللغه الإنجليزيه وتعمل معلمه


** سلمان .. متزوج ايضا وله ولد وبنت طويل القامه ايضاً وابيض وأصلع يتميز بشاربه الكثيف الذي يغطي على شفته العليا عنيد وحاد المزاج مثقف ويقضى أكثر وقته في القراءه يعمل في الخطوط الجويه تلقى تعليمه الجامعي في أمريكا حياته خارج المملكه اكسبته نظره مختلفه للحياة


** يوسف .. متزوج قبل سنتين له ولد واحد يعيش مع زوجته حياه هادئه قصير القامه عريض الجسم قليل الكلام ولا يحب ان يقحم نفسه في المجادلات


** نواف


** ماجد..اعزب يدرس في جامعة الملك عبد العزيز بجده ويعتبر الأخ والصديق لنواف يشبه نواف كثيرا في ملامحه وفي شخصيته الى انه متهور نوعا ما تلقى أكبر صدمه له عندما انتقل نواف للعمل في الرياض


** أحمد .. أصغر أفراد العائله يدرس في الصف الثالث الثانوي وسيم ومرح يحب الضحك وهو دلوع العائله ولايشاركهم الحديث كثيرا الا اذا كان فيما يخص الرياضه


تتوسطهم والدتهم مريم


عند إكتمال أفراد العائله


يبدأ سعود بالحديث قائلا : شفتوا أخوكم نواف وش سوى


سلمان ومها : وش سوى


سعود: متعرف على وحده بالرياض مادري وش بينه وبينها والحين يبي يتزوجها



سلمان : طيب وين المشكله ؟؟


مها : وشوووووووووووووووووووووووو ؟ سلمان انت تقول وين المشكله



سلمان : ايه هذي حياته هو حر فيها اذا طلعت البنت من عائله تمام ومتربيه وش المانع


سعود : هو كلمك قال لك شيء ؟؟


سلمان : والله توني أسمع منك حتى يوم قلتوا اليوم الغداء عند أمي جيت ماني متوقع انكم بتتشاورون بموضوع مثل هذا..



سعود : عرفنا انه ماكلمك طيب وش فيك كذا من البدايه وانت ماسمعت شيء أعطيت رأيك



سلمان : الرأي الاول والأخير لنواف صاحب الشأن



مها : اقول سلمان دام هذا كلامك الله يخلف على عيالك


مريم : ياعيالي انتم جايين تهاوشون هو انتم ماتجتمعون كلكم عندي الا بالعيد جايين تهاوشون ؟‍!


سعود : يا أمي انتي وش رأيك



مريم : مابغاه يتزوجها بس انتم لاتزعلونه حاولوا ترضونه بالطيب



سلمان : ليش تتدخلون بحياته ؟؟



سعود : سلمان انت ماتحترم أمي ؟؟



** الجزء العشرون **

سلمان : انا ما قلت لأمي شيء يزعلها بس هذا موضوع يخص انسان ماهو جالس معنا الحين ليش كل واحد يفتي على كيفه


سعود : نواف بزر مجنون مايعرف مصلحة نفسه



ماجد : سعوووووود.. نواف غايب لاتقول عنه بزر



سعود : تعال عطني كف .. ههه والله حاله بنسكت احنا والبزارين يتكلمون



سلمان : طيب ليش جامعنا وانت ما تبي البزران يتكلمون وبعدين ماجد رجال ومتعلم وماغلط عليك الحين بالعكس انتقد شيء خطأفيك انك تغتاب انسان غايب



سعود : انت يا سلمان مايهمك بس والله لو ولدك اللي بيتزوج وحده كذا ماترضى انت من متى تهتم بأخوانك


مها : صادق سعود سلمان انت من متى تدري عن نواف والا عن مشاكله ؟؟ بس جاي الحين تدافع عنه ... نواف مثل ما أبوي وامي ربوه حتى انا ربيته ماكان يهتم له بدراسته ومذاكرته الا انا ولا بخليه يضيع كذا


سلمان : وحطيتوه بيضيع ليش اخونا مدمن مخدرات وانا مادري ؟


مها : أقسم بالله محد يحب نواف كثر ما أحبه انا واني اكثر وحده محترق قلبي على اخوي وانت ياسلمان والله ماهمك نواف عشان كذا تقول الكلام هذا


ماجد : واضح الحب



سعود : ماجد احترم اختك اللي اكبر منك وتكلم معها زين


ماجد : انا ماقلت لها شيء


ليلى : الحين انتم وش بتقررون


أحمد : صح النوم يا أختى الكبيره هههههههههههههههه


الجميع يضحك ولا يقطع ضحكهم سوى اتصال من سلمان وهو يقول : الووووووو نواف



نواف : هلا سلمان


سلمان : وش فيك زعلان ترى ماسويت لك شيء انا ههههههه اسمع ياخويه انا بجيك الرياض وماعليك لاتشيل هم بنشوف اذا طلعوا الناس اصل وفصل واخلاقهم زينه لاتشيل هم وانا اخوك


سعودبصوت عالي يريد ان يسمعه نواف : والله مايفرح بها


سلمان : نواف اكلمك بعدين فمان الله


نواف : مع السلامه


طوط طوط طوط


سلمان : هي عناد الحين يوم تقول والله ماتفرح بها ؟؟


سعود: وانت ليش متصل فيه وحنا ماقررنا شيء مجتمعين عشان نتناقش وانت تتصل فيه وتأيده على خطاه


ماجد : وانا بعد بتصل فيه واشجعه وبوقف معه للنهايه ..


أحمد : حتي ليلى أكيد بتكلمه تسأله عن الجو بالرياض


الجميع يضحك


يوسف يتكلم اول مره : والحل ترى زوجتي ماعندها احد بالبيت تبون مني شيء الحين عموما اللي تقررونه انا معكم


سعود :انا مابغير رأيي


سلمان: هذي حياة نواف وقرارك فيها مابيغير شيء


مها : الا بيغير وصدقني ياسلمان بخليكم تتعبون انت ونواف وبخرب عليكم بالنهايه دامني ماقتنعت احسن لكم لا تتعبون انفسكم


سعود: وانا بعد عندي اكثر من اسلوب بس انا مابزعل امي


سلمان : ها وش رأيك يا أمي


مريم : انا الحين رأيي انكم تتصالحون


سلمان يضحك : واحنا ماتهاوشنا هذا نقاش بيننا بس انتي تعرفين يا أمي العرب كذا يتناقشون


أحمد: الإتجاه المعاكس ببيتنا اليوم


سلمان: وليلى وش رأيها


ليلى : نشوف البنت واهلها ونقرر


سعود : ليلى ترضين ان اخونا يطيح الطيحه هذي


سلمان : سعود انت محد معك برايك لانه تدخل بحياة انسان وكل اللي جالسين الحين اتحدى احد منهم يرضى انك تتدخل بحياته


مها : ان ارضى اخوي الكبير اذا بيتدخل عادي



ماجد قاصدا ً إغاضة مها : سلمان وين نسوي عرس نواف



سلمان: والله مادري الرأي راي نواف



سعود : والله ياماجد طلع لك صوت اقول روح ذاكر دروسك احسن لك



ماجد : انت تبينا كذا دايم بدون صوت والصوت لك انت وبس ..



سعود : لاتطول لسانك ياورع



ماجد : انا ماطول لساني انا اقول رأيي


ينهض سعود بسرعه ويتجه جهة ماجد



ليلى الأخت الكبيره تقوم وتعترض سعود وهي تبكي : سعود عشاني لاتسوي له شيء


سلمان بعصبيه وصوت عالي يسمعه الجيران : الولد لاتمد ايدك عليه لو ابوي الله يرحمه فيه والله ماتتجرأ تحاول تسويها


الجميع ينظر لسعود بنظره سلبيه بعد كلام سلمان المؤثر ماعدا مها التي لازالت تؤيد


مريم تبكي : خلاص خلاص بقول كلمه اذا تحبون امكم لاتردونها



جميع الابناء ينظرون بإتجاه والدتهم







   

رد مع اقتباس